Łukašenka pradoŭžyŭ na hod biaźvizavy režym dla susiedziaŭ ź Jeŭrasajuza
Alaksandr Łukašenka 21 śniežnia «padtrymaŭ prapanovu» ab pradaŭžeńni na 2023 hod biaźvizavaha režymu dla hramadzian Polščy, Łatvii i Litvy, paviedamiła jahonaja pres-słužba.
21.12.2022 / 18:23
Biaźviz uviali z 15 krasavika dla litoŭcaŭ i łatvijcaŭ (uklučajučy žycharoŭ Łatvii sa statusam niehramadzianina) i z 1 lipienia — dla palakaŭ. Pavodle źviestak Dziaržpahrankamiteta, za hety čas biaźvizavym ujezdam skarystałasia amal 370 tysiač žycharoŭ susiednich ź Biełaruśsiu krain Jeŭrasajuza.
Bolš za 70% tych, chto zajechaŭ u Biełaruś pa biaźvizie, składajuć litoŭcy, łatvijcaŭ — kala 20%, palakaŭ — 10%.
Biaźvizavy režym vyrašana pradoŭžyć «u paćviardžeńnie adkrytaści našaj krainy, nacelenaści na dobrasusiedstva i ŭmacavańnie mižnacyjanalnych suviaziaŭ», — havorycca ŭ paviedamleńni łukašenkaŭskaj pres-słužby.