Jak vy dumajecie, kolki ŭ Polščy dapłačvajuć tym, chto aciaplaje damy vuhalem?
Prapahanda raskazvaje, što Jeŭropa zamiarzaje. Biełarusy, jakija žyvuć za miažoj ci majuć tam svajakoŭ, śmiajucca z hetaha. Heta jašče nie ŭsio. U toj ža Polščy ŭłady vypłačvajuć nie tolki dapamohu na dziaciej školnych hadoŭ i 13-ju piensiju, ale i na aciapleńnie dajuć subsidyi.
15.12.2022 / 20:19
Polski vuhal. Fota: 123rf.com
U Biełarusi svaje damy topiać dryvami ci brykietam. U Polščy lesu i bałatoŭ mała, zatoje jość svoj vuhal. I polskija ŭłady vydzialajuć subsidyi dla tych, chto aciaplajecca vuhalem. I heta niemałyja hrošy: 1700 rubloŭ i navat bolš štohod.
Polšča, jak i inšyja jeŭrapiejskija krainy, sutykajecca z nastupstvami paliŭnaha kryzisu, vyklikanaha napadam Rasii na Ukrainu. Sioleta naša zachodniaja susiedka całkam admoviłasia ad rasijskaha hazu i nafty. Kamisija Siejma raspačała pravierku ździełak z Rasijaj ab ich pastaŭkach u minułym. Palityki ličać, što tyja ŭhody pryviali da zaležnaści krainy ad rasijskaha paliva. Taksama było nakładziena embarha na pastaŭki vuhalu z Rasii, jakim zakryvali deficyt hetaj syraviny.
U Polščy vuhal zdabyvajuć taksama, ale jon abychodzicca daražej, čym, naprykład, rasijski ŭ Kuzbasie, bo zalahaje hłybiej, a zarobki šachcioraŭ — bolš vysokija.
Tracina polskich pryvatnych haspadarak aciaplaje žytło vuhalem. Heta samy papularny vid aciapleńnia paśla centralnaha. Sioleta košt vuhalu istotna vyras.
Letaś tona vuhalu kaštavała 800—1000 złotych (450—560 rubloŭ) za tonu.
Ciapierašni siaredni košt tony vuhalu ŭ zaležnaści ad jakaści składaje 3000—4000 złotych (1700—2200 rubloŭ). Kupić jaho možna i tańniej, ale składana. Jon raskuplajecca, abo pa jaho treba doŭha stajać u čerhach.
Siaredni zarobak u Polščy — 6500 złotych (3700 rubloŭ), a piensija — pad Z000 złotych (1700 rubloŭ).
U suviazi z padaražeńniem vuhalu mnohija siemji atrymali mahčymaść mieć padvojnuju i patrojnuju dapamohu ŭ jaho nabyćci. Kožnaja siamja moža atrymać subsidyju ŭ pamiery 3000 złotych (1700 rubloŭ). A kali ŭ domie žyvuć niekalki siemjaŭ i heta zarehistravana, to kampiensacyja moža być bolšaj: 6000 (3400 rubloŭ) i navat 9000 złotych (5100 rubloŭ).
Pavodle danych Handlova-pramysłovaj pałaty, u aciaplalnym siezonie 2021/2022 za nabyćcio vuhalu ŭ siarednim palaki płacili 2992 złotych (1705 rubloŭ).
Na maleńki dom, naprykład, patrebna bolš za 3 tony vuhalu na siezon.
Situacyja z cenami na vuhal zastajecca niestabilnaj. Na ich rost upłyvaje vajna va Ukrainie i embarha na pastaŭki vuhalu z Rasii.
Darahoŭla palakam nie padabajecca, ale adkrytaj niezadavolenaści niama. Uładzie ŭdajecca znachodzić mahčymaści dla parazumieńnia ź ludźmi. Uradaŭcy pryznajuć, što z-za rekordnych cen palaki, asabliva samyja biednyja, dla aciapleńnia žytła vykarystoŭvajuć paliva z horšymi paramietrami, čym raniej.
Polšča zdabyvaje svoj vuhal. Sioleta sa studzienia pa kaniec červienia jaho zdabyli bolš za 27 miljonaŭ ton. Heta nie rekordny pakazčyk. U pieršym paŭhodździ 2015 hoda było zdabyta 34,38 miljona ton. Mienš za ŭsio vuhalu za pieršyja paŭhoda zdabyli padčas pandemii — u pieršym paŭhodździ 2020 hoda było 26,5 młn ton.
Pakul Polšča abychodzicca svaim vuhalem, ale jaho brakuje. Urad zajaŭlaje, što ceny na vuhal źmienšacca, jak tolki na polski rynak prybuduć 5 miljonaŭ ton vuhalu, zakuplenych u Kałumbii, Indanezii, Aŭstralii i Paŭdniovaj Afrycy.