З гадамі ў мужчын валасы пачынаюць расці ў незвычайных месцах. Чаму?
Гэта пачынаецца паступова: магчыма, валасінкі пачынаюць звісаць з ноздраў, а цырульнік прапануе падстрыгчы валасы на мочцы вуха. Шмат для каго з мужчын рост валос у ноздрах і вушах — звыклая частка старэння, але чаму так адбываецца і што з гэтым рабіць?
15.12.2022 / 22:29
Фота: Pixabay
Кароткі адказ: рост валасоў у сталых мужчын шмат у чым звязаны з узроўнем тэстастэрону і генетыкай. Але ўсё гэта не азначае, што з непрыемнай з’явай нельга нічога зрабіць, тлумачыць New York Times.
На тое, дзе і як на целе растуць валасы, уплываюць гармоны. Напрыклад, у час палавога выспявання такія андрагены (палавыя гармоны), як тэстастэрон, запускаюць валасяныя фалікулы на твары, грудзях, падпахах і лабковай зоне. Тады кароткія светлыя валасінкі на гэтых месцах замяняюцца на больш густыя і цёмныя, што растуць больш працяглы час.
Калі мужчыны дасягаюць 40—60 гадоў, тэстастэрон часам пачынае ўплываць на рост валасоў у іх па-новаму, часам незразумелым чынам. Часткі вашага цела, пра якія вы нават не здагадваліся, што там ёсць валасяныя фалікулы, напрыклад, верхняя частка носа ці мочкі вушэй, могуць стаць адчувальнымі да тэстастэрону, што назапашваўся гадамі. Праз гэта валасінкі ў гэтых зонах робяцца больш густымі і доўгімі, а ў выніку і больш прыкметнымі.
Тое, наколькі актыўна растуць валаскі на носе і ў вушах, залежыць і ад генетыкі. Вось чаму ў некаторых людзей можа, напрыклад, вырасці прыгожая густая барада, а ў некаторых — не. Калі вы з тых, у каго добра растуць валасы на твары, верагодна, такая ж рыса будзе і ў вашага сына.
Калі вы жадаеце пазбавіцца ад залішніх валос у носе ці вушах, у вас ёсць наступныя варыянты. Перш за ўсё можна паспрабаваць лазерную эпіляцыю. Каб атрымаць добры вынік, вам, хутчэй за ўсё, спатрэбіцца некалькі сеансаў, але эфект ад іх даволі працяглы. Дзейнічае яна такім чынам: пігмент воласа паглынае святло ад лазера ў выглядзе цяпла, і потым гэтае цяпло пашкоджвае фалікул, чым перашкаджае росту воласа.
Лазер добра працуе на цёмных валасах, калі ж яны ў вас больш светлыя, можна разгледзець пытанне аб электраэпіляцыі (цёмныя валасы яна таксама прыбірае). Падчас яе ў кожны валасяны фалікул уводзіцца маленькая іголка, якая выпускае электрычны ток. Ён разбурае фалікул і гэтым спыняе рост валасоў. І лазерная, і электраэпіляцыя могуць быць даволі балючымі, а для працяглага эфекту спатрэбіцца некалькі сеансаў.
Можна выбіраць і кароткатэрміновыя рашэнні: эпіляцыю воскам, галенне, стрыжку, выскубанне валасоў і выкарыстанне крэмаў для іх выдалення. Галоўнае — выконваць напісаныя на крэмах інструкцыі, бо інакш такія сродкі могуць пашкодзіць скуру. Улічвайце таксама, што эпіляцыя воскам і выскубанне валасоў могуць выклікаць раздражненне скуры.