Syn napaŭ na maci i ŭvatknuŭ joj u hałavu kuchonny nož. Ale historyja skončyłasia inakš
Strašnaja historyja adbyłasia ŭ Hrodnie. Ale nievierahodnaja i jaje kancoŭka.
27.11.2022 / 23:37
Skrynšot: videa ANT
Pačałasia jana z taho, što ŭ milicyju pazvaniŭ mužčyna, raskazvajuć u siužecie ANT. Płakaŭ, što pryjšoŭ i pabačyŭ maci ŭ žudasnym stanie, što jaje źbili, a ŭ jaho skrali dzicia.
Kali ž miedyki pryjechali, žančyna lažała ŭ kryvi, z hałavy tyrčaŭ kuchonny nož. 13-santymietrovaje lazo prajšło ad skroni da skroni. Žančyna na momant pryjezdu miedykaŭ była jašče ŭ śviadomaści i zmahła navat pahavaryć ź imi. Jana skazała miedykam, što pasvaryłasia z synam.
Skrynšot: videa ANT
Susiedzi raskazvajuć, što mužčynu hadavała babula. Z maci jany časta skandalili.
Pa słovach milicyi, žančyna apošnija 20 hod pastajanna ŭ Biełarusi nie žyła, pieryjadyčna pryjazdžała siudy ź Italii. Z synam u ich zdaralisia sprečki.
Mužčyna ciapier pad vartaj. Na jaho zaviali kryminalnuju spravu za zamach na zabojstva.
Nievierahodna toje, što žančyna pry takoj traŭmie vyžyła. Niejrachirurhi zmahalisia za jaje žyćcio niekalki hadzin, dziesiać dzion jana pralažała ŭ reanimacyi. Ciapier jaje stan siaredniaj stupieni ciažkaści, stabilny. Adnak traŭma surjoznaja, i žančynu čakaje doŭhaja reabilitacyja.