Пачаўся суд над былым журналістам БТ Дзмітрыем Лукшам
Сёння ў Мінскім гарадскім судзе пачаўся суд над экс-журналістам БТ Дзмітрыем Лукшам, яго жонкай Палінай Палавінкай і яшчэ трыма фігурантамі справы — Анастасіяй і Дзянісам Яроўскімі, Канстанцінам Ніканоравым, піша «Вясна».
18.11.2022 / 14:19
Дзмітрый Лукша
Фігурантаў справы абвінавачваюць у «дыскрэдытацыі Беларусі», а таксама «актыўным удзеле ў групавых дзеяннях, якія груба парушаюць грамадскі парадак».
Паводле версіі абвінавачвання, Лукша з мэтай дыскрэдытацыі краіны з дапамогай аператара зняў шэраг відэасюжэтаў, якія змяшчалі загадзя лжывую інфармацыю.
Быццам бы «па яго ўказанні жонка, хаваючы свой твар, прадставілася грамадзянкай Сірыі, якая нібыта жыве ў стыхійным лагеры ў Беларусі. Яна агучыла загадзя падрыхтаваны тэкст з непраўдзівымі звесткамі аб невыкананні правоў мігрантаў, незадавальненні іх базавых патрэб, дэфіцыце вады і ежы, пры гэтым Лукша пацвердзіў, што асабіста назіраў гэтыя парушэнні».
«На відэа, знятым за мяжой, на якім дэманстраваўся дэфіцыт тавараў і валюты, Лукша наклаў свой закадравы голас, пры гэтым паведаміў, што ў сюжэце паказана сітуацыя ў Беларусі».
Лукша працаваў пазаштатным карэспандэнтам казахстанскага тэлеканала «Хабар 24». Лукша, Палавінка і Яроўскі знаходзяцца пад вартай. Жонка Дзяніса Анастасія на суд не з'явілася.