Pastara asudzili na 3 hady «chatniaj chimii» za ŭdzieł u pratestach
U sudzie Zavodskaha rajona Minska 11 listapada asudzili palitźniavolenaha Vitala Čyčmarova pavodle č. 1 art. 342 (Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich) Kryminalnaha kodeksa, piša «Viasna».
11.11.2022 / 16:18
Vitala zatrymali 19 krasavika. U jaho doma praviali vobšuk i zabrali techniku. Spačatku mužčynu ŭtrymlivali ŭ SIZA KDB, zatym pieraviali ŭ SIZA-1.
Pryčynaj zatrymańnia Vitala staŭ jaho udzieł u dziejnaści niezaležnaha prafsajuza mietalistaŭ. Inšych udzielnikaŭ prafsajuznaha ruchu zatrymlivali ŭ toj ža dzień, što i Vitala, u Minsku.
11 listapada sudździa Zavodskaha suda Minska Žanna Chvajnickaja pryznała Vitala Čyčmarova vinavatym pavodle č. 1 art. 342 (Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich) Kryminalnaha kodeksa i prysudziła jamu pakarańnie terminam 3 hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»).
Z ulikam času, praviedzienaha ŭ SIZA, Vitalu zastajecca adbyć termin 1 hod i 10 miesiacaŭ. Mužčynu vyzvalili ŭ zale suda.
Vital Čyčmaroŭ — pastar baptysckaj carkvy «Śviatło Nadziei», były inžynier zavoda imia Kazłova. Siabra niezaležnaha prafsajuza mietalistaŭ. U 2020 hodzie byŭ aktyŭnym udzielnikam prafsajuznaha ruchu za sumlennyja vybary i hodnyja ŭmovy pracy.