«Сваіх не кідаем». Мінскі Свята-Елісавецінскі манастыр актыўна спрыяе расійскай агрэсіі ва Украіне
У жніўні ў манастыры была створана валанцёрская група «Дапамога братам» пад кіраўніцтвам манашкі Аляксандры. Яна займаецца зборам сродкаў для патрэбаў расійскіх вайскоўцаў, якія вядуць захопніцкую вайну ва Украіне, паведамляе «Хрысціянская візія».
02.11.2022 / 22:33
Валанцёрская група створаная з ініцыятывы і бласлаўлення духоўніка манастыра протаіерэя Андрэя Лемяшонка, вядомага сваімі прарасійскімі і пралукашэнкаўскімі поглядамі. Займаецца гэтая група не толькі зборам дапамогі, але і напісаннем лістоў салдатам: на канвертах так і напісана — «дорогому солдату из Белой Руси / Белоруссии».
Валанцёрская група Свята-Елісавецінскага манастыра супрацоўнічае з такой жа групай, створанай за паўгода да таго, адразу пасля пачатку шырокамаштабнай вайны, у манастыры Марыі Магдаліны ў сяле Нікольскае Арлоўскай вобласці.
Варта адзначыць, што і раней Свята-Елісавецінскі манастыр на працягу многіх гадоў займаўся аказаннем гуманітарнай дапамогі «ДНР» і «ЛНР». Аднак тады гэтая дапамога дэкларавалася як дапамога не вайскоўцам, а «мірным жыхарам».