«Рост попыту на беларускасць». У «Трыбуны» з'явілася беларускамоўная версія
Самы папулярны беларускі спартыўны сайт «Трыбуна» (by.tribuna.com) перазапусціўся, і цяпер ён мае і беларускамоўную версію. Навошта і як гэта было зроблена? Спыталі ў кіраўніка праекта Максіма Беразінскага.
02.11.2022 / 15:39
Фота: by.tribuna.com
Максім распавядае, што з’яўленне беларускамоўнай версіі «Трыбуны» стала адказам на рост попыту на беларускасць.
Беразінскі тлумачыць, што да падзей 2020 года і 24 лютага цяперашняга года, калі пачалося маштабнае ўварванне Расіі ва Украіну, чытаць «Трыбуну» па-беларуску згадзіліся б каля 5-7 адсоткаў аўдыторыі. Цяпер жа, гледзячы на вынікі праведзенага сайтам апытання, на такі крок гатовыя больш за палову чытачоў: «Не ведаю, ці ўсе выкарыстаюць такую магчымасць зараз — будзем назіраць. Нам самім вельмі цікава, які адсотак людзей гатовы да такой мяккай беларусізацыі на справе, а не на словах».
— Менавіта цяпер, калі павялічылася колькасць людзей, якія гатовыя карыстацца беларускай мовай, важна яе прасоўваць, — кажа кіраўнік «Трыбуны». — Тым больш што «цяпер такі час, калі кожны павінен рабіць дзеля Беларусі тое, што ён можа рабіць».
Максім мяркуе, што такі падыход дапаможа частцы людзей хутчэй звыкнуцца з ужываннем беларускай мовы і, магчыма, перайсці на яе. Так чалавек будзе не спецыяльна вывучаць мову, а чытаць на ёй, напрыклад, навіны спорту.
Намаганне больш чытаць па-беларуску, лічыць Максім, гэта той уклад, які можа зрабіць кожны беларус дзеля захавання краіны і незалежнасці.
Адначасова са стварэннем беларускамоўнай версіі рэсурсу «Трыбуна» цалкам перазапусціла ўвесь сайт. Новая версія медыя, тлумачыць Беразінскі, пакуль што крыху абмежаваная ў параўнанні з мінулай: «Ніхто ў камандзе не рабіў такія маштабныя пераезды. Гэта нялёгкая праца, якая легла на плечы каманды распрацоўкі. Нам было крышачку лягчэй, таму што мы рабілі новую платформу пад дзве краіны — Украіну (Максім мае на ўвазе рэсурс ua.tribuna.com — «НН») і Беларусь. Але ўсё адно лічым, што выкацілі версю 0.9. Пакуль там не хапае шмат звыклага функцыяналу — пошуку па тэгах (пакуль можна шукаць только праз Google), статыстыкі па хакеі, баскетболе і іншых гульнявых відаў спорта, акрамя футбола. Будзем намагацца як мага хутчэй вярнуць гэтыя фічы».
Максім расказвае, што рост попыту на беларускасць адбіўся нават на пошуку супрацоўнікаў: «Цікава, што менавіта пад абвестку пра беларускую мову нам прыйшло значна больш рэзюме, чым звычайна. Многія людзі прапанавалі дапамогу і гатовыя былі працаваць нават без грошай. Гэта вельмі прыемна. Сапраўды, стаўленне да беларускай мовы мяняецца тут і цяпер. І мы радыя, што змаглі адказаць на гэта запыт аўдыторыі».