Raźviedka Ukrainy: Rasija masava zavozić u Biełaruś drony, a vyvozić techniku i bojeprypasy
U Biełaruś pa stanie na 10 kastryčnika zavieźli ŭžo 32 iranskija drony-kamikadze Shahed-136, paviedamlaje HUR Minabarony Ukrainy.
11.10.2022 / 11:58
«U Biełaruś pastupajuć iranskija drony-kamikadze Shahed-136 (u armii RF pierajmienavanyja ŭ «Hierań-2»). Pa stanie na 10 kastryčnika na terytoryju krainy byli zaviezienyja 32 nazvanyja BPŁA, da 14 kastryčnika płanujecca zavieźci jašče 8», — paviedamlaje HUR.
U HUR taksama paviedamili, što Biełaruś daje akupacyjnaj armii materyjalna-techničnyja srodki i bojeprypasy sa svaich składaŭ. U pryvatnaści, na čyhunačnuju stancyju «Kiraŭskaja» ŭ Krymie prybyŭ čyhunačny ešałon z bojeprypasami — 12 vahonaŭ (492 tony), jaki byŭ adpraŭleny z 43-ha arsienała zachoŭvańnia rakiet i bojeprypasaŭ US Biełarusi (Dobruš, Homielskaja vobłaść).
U najbližejšy čas, pavodle HUR, zapłanavanaje pieramiaščeńnie 13 ešałonaŭ z uzbrajeńniem i vajennaj technikaj (219 płatformaŭ), bojeprypasami (28 vahonaŭ) i vajenna-techničnaj majomaściu z arsienałaŭ i baz zachoŭvańnia US Biełarusi.
U roli asnoŭnych «pastaŭščykoŭ» vystupajuć:
— 46 arsienał zachoŭvańnia rakiet i bojeprypasaŭ (Bronnaja Hara, Bresckaja vobł.);
— 43 arsienał zachoŭvańnia rakiet i bojeprypasaŭ (Dubieckaje, Homielskaja vobł.);
— 391 artyleryjskaja baza bojeprypasaŭ (Bobr, Minskaja vobł.);
— 969 baza reziervu tankaŭ (Urečča, Minskaja vobł.);
— 288 baza reziervu aŭtamabilaŭ (Staryja Darohi, Minskaja vobł.).
Hruzy, pavodle źviestak HUR, pavinny prybyć na čyhunačnyja stancyi «Kamienskaja» (Kamiensk-Šachcinski) i «Marcava» (Tahanroh) Rastoŭskaj vobłaści.
Dniami stała viadoma, što Łukašenka pierakidvaje tanki ź biełaruskaha stratehičnaha reziervu ŭ Rasiju.