ŚMI: U Abchaziju ź nieaficyjnym vizitam prybyŭ Alaksandr Łukašenka. Aficyjnych paćviardžeńniaŭ niama
Pavodle krynic «Echo Kavkaza», samaabvieščanuju respubliku Abchaziju ź nieaficyjnym vizitam naviedvaje Alaksandr Łukašenka.
28.09.2022 / 14:38
U sacsietkach publikujuć videakadry, na jakich bačny nieviadomy kartež, jaki pieramiaščajecca pa Abchazii ŭ supravadžeńni mašyn darožna-patrulnaj słužby. Telegram-kanał AMRA-life piša, što «kartež z prezidentam siabroŭskaj krainy ŭžo prajechaŭ Hahru».
Ale dakładnaj infarmacyi niama i ŭ abchazaŭ. Pa słovach žurnalistki Izidy Čanija, «vielmi drenna, što hramadstva nie viedaje dakładnaj infarmacyi». «Usia Abchazija hadaje, chto zajechaŭ da nas u hości», — adznačyła jana.
26 vieraśnia Alaksandr Łukašenka prylacieŭ u Sočy z pracoŭnym vizitam da prezidenta Rasii Uładzimira Pucina.
Ale nastupnyja dva dni nijakich navin pra jaho vizit nie było. Tolki pres-sakratar Kramla Piaskoŭ skazaŭ, što nibyta sustreča Pucina i Łukašenki praciahvajecca.
Alaksandr Łukašenka raniej zajaŭlaŭ, što nie vyklučaje pryznańnia niezaležnaści Abchazii i Paŭdniovaj Asiecii. Pavodle jaho, jak tolki jon zrazumieje nieabchodnaść hetaha kroku, i pra heta jamu skaža prezident RF Uładzimir Pucin, tady heta moža adbycca. Pres-sakratar prezidenta RF Dźmitryj Piaskoŭ paśla hetaha skazaŭ, što Kreml nie budzie pasyłać niejkija sihnały Alaksandru Łukašenku ab nieabchodnaści pryznańnia niezaležnaści Paŭdniovaj Asiecii i Abchazii, a taksama Kryma jak rasijskaha rehijona.
U žniŭni 2021 hoda Łukašenka raspavioŭ, čamu nie pryznaŭ Paŭdniovuju Asieciju i Abchaziju. Pavodle jaho, Zachad pahražaŭ Minsku dadatkovymi sankcyjami ŭ vypadku pryznańnia niezaležnaści hetych samaabvieščanych respublik, Maskva ž admoviłasia kampiensavać ekanamičnyja straty. Pry hetym jon nazvaŭ «niadobrym faktam», kali «Asieciju adarvali ad Hruzii».
Abchazski lidar Asłan Bžanija kazaŭ, što Abchazija hatovaja dałučycca da Sajuznaj dziaržavy Rasii, Biełarusi i inšych krain, jakaja moža być utvoranaja paśla vajny va Ukrainie. Pry hetym abchazski lidar dadaŭ, što ŭ Abchazii niama aficyjnych kantaktaŭ z kiraŭnictvam Biełarusi.