Nastaŭnik dla dziaciej pa raspracoŭcy hulniaŭ typu Minecraft i turemščyk. Pahladzieli vakansii Mahiloŭščyny
«Naša Niva» prahledzieła abviestki ab pracoŭnych vakansijach na ŭschodzie Biełarusi. Jakich śpiecyjalistaŭ šukajuć pradpryjemstvy i ŭstanovy i kolki hatovyja im płacić?
28.09.2022 / 10:32
Mahiloŭ, Padmikolle
Mahiloŭ
U Mahilovie pryvabnaja vakansija jość u pryvatnaj kampanii, jakaja raspracoŭvaje i prasoŭvaje sajty. Joj patrabujecca mieniedžar prodažaŭ ź viedańniem anhlijskaj movy. Za miesiac pracy jamu hatovyja płacić 3500 rubloŭ.
Hałoŭnaha architektara prajektaŭ šukaje pryvatnaja arhanizacyja, jakaja akazvaje pasłuhi ŭ halinie ekałahičnaha i sanitarnaha prajektavańnia. Śpiecyjalistu ź jak minimum trochhadovym dośviedam pracy na takoj pasadzie i zdolnaha samastojna administravać prajekt najmalnik hatovy płacić ad 1800 rubloŭ.
Mahiloŭskim lakarniam brakuje miedykaŭ i techničnaha piersanału. Bolnicy majuć patrebu ŭ admysłoŭcach vuzkaj śpiecyjalizacyi. Naprykład, u psichijatryčnuju bolnicu patrabujucca psichijatry. Im abiacajuć 1180 rubloŭ. U anatacyjach da vakansijaŭ paznačana, što na pracu pretendenta voźmuć tolki pa sumoŭi i, kab u jaho pracoŭnaj knižcy nie było paznak ab parušeńniach dyscypliny, za jakija zvalniali.
Abłasny lačebna-dyjahnastyčny centr šukaje doktara-specyjalista, hatovaha pracavać za 1200 rubloŭ. Heta samy vysoki zarobak, prapanavany patencyjnamu supracoŭnikamu miascovaj miedyčnaj ŭstanovaj.
Sami miedyki kažuć, što nichto ź ich nie pracuje na adnu staŭku. U bolnicach zaŭsiody nie chapaje aniestezijołahaŭ-reanimatołahaŭ. U paliklinikach brakuje ŭčastkovych terapieŭtaŭ i piedyjatraŭ, jany absłuhoŭvajuć nie adzin učastak. Vialikaja ciakučka kadraŭ i na chutkaj dapamozie.
Techničny piersanał u miedyčnych ustanovach moža raźličvać na zarobak da 700 rubloŭ. Patrabujucca sanitarki, ślesary-santechniki, elektramanciory. Ich voźmuć, kali ŭ pracoŭnaj knižcy nie budzie zapisaŭ ab zvalnieńni za prahuły abo za znachodžańnie na pracoŭnym miescy ŭ stanie ałkaholnaha apjanieńnia.
Babrujsk
Jak i ŭ Mahilovie, samyja hrašovyja vakansii ŭ Babrujsku — u arhanizacyjach, źviazanych z IT-halinoj. Voś niezvyčajnaja:
šukajuć IT-nastaŭnika dla dziaciej pa raspracoŭcy hulniaŭ (Minecraft, Roblox, Unity, Construct 3, Unreal Engine). Takomu admysłoŭcu najmalnik hatovy płacić 80 tysiač rasijskich rubloŭ (3200 biełaruskich).
Pretendent musić vałodać dośviedam stvareńnia kampjutarnych hulniaŭ i vykładańnia infarmatyki ci prahramavańnia dzieciam školnaha ŭzrostu, a taksama mieć vyšejšuju adukacyju. Najmalnik razhledzić reziume ad studentaŭ.
Pa-za IT-siektaram najbolšyja zarobki prapanujuć siłavyja struktury. Tak, babrujskaja papraŭčaja kałonija № 2 šukaje načalnika atrada. Jamu hatovyja płacić na ruki da 1600 rubloŭ.
Pretendent pavinien mieć «vyšejšuju skončanuju adukacyju, być adsłužyŭšy va Uzbrojenych siłach albo mieć adterminoŭku ad słužby na zakonnych padstavach. Asabliva adznačana, što pretendent musić być stresaŭstojlivym.
Sielhaspradpryjemstva «Nieŭski-ahra» z Babrujskaha rajona šukaje nie tolki žyviołavodaŭ i palavodaŭ, ale taksama namieśnika kiraŭnika pa ideałahičnaj pracy. Ideołahu haspadarka hatovaja płacić 1500 rubloŭ. Žyviołavod ža, naprykład, moža raźličvać na 550 rubloŭ.
Babrujskija pradaŭcy ŭ sietkavych kramach za miesiac zarobiać da 700 rubloŭ. Dla achvotnych pracavać na kasach svabodnych vakansijaŭ u horadzie na Biarezinie niamała.
Klimavičy
U Klimavickim rajonie adna ź miascovych pryvatnych arhanizacyjaŭ šukaje «rehijanalnaha pradstaŭnika» i abiacaje jamu da 4500 rubloŭ. Taki śpiecyjalist maje raźbiracca ŭ praduktyŭnaj žyviołahadoŭli i kambikormavaj vytvorčaści.
U Klimavickim rajonnym centry zaniataści nasielnictva prachodzić kirmaš vakansijaŭ. Biespracoŭnych na videa zdymaje apieratyŭnik. Fota: rodniva.by
Bolš jak dva dziasiatki rabotnikaŭ patrabujucca słavutamu Klimavickamu likiora-harełačnamu zavodu: hruzčyki, naładčyki, ekśpiedytary.
Naładčyk abstalavańnia moža raźličvać da 900 rubloŭ. Heta samaja hrašovaja prapanova dla patencyjnaha pracaŭnika. Ekskavatarščyku na tracinu staŭki vypłaciać 150 rubloŭ. Hruzčyku abiacajuć da 250-ci.
Na zavod vodziać na ekskursii navučencaŭ miascovaj himnazii. Im pakazvajuć učastki hatavańnia i raźlivu ałkaholnych napitkaŭ, a taksama hatavańnia likiora-harełačnaj pradukcyi. Zavod maje patrebu ŭ śpiecyjalistach i raźličvaje, što, pabačyŭšy vytvorčaść, himnazisty zachočuć tut pracavać pa skančeńni vučoby.
U Klimavickim rajonie Likiora-harełačny zavod horadaŭtvaralny. Razam ź miascovym kambinatam chlebapraduktaŭ jon najvialikšaje pradpryjemstva horada. Na ich ustojlivaści trymajecca miascovaja ekanomika. Što da likiora-harełačnaha zavoda, to jon u piaciorcy pradpryjemstvaŭ, jakija najbolš unosiać u biudžet Mahiloŭskaj vobłaści.
Chocimsk
Miascovy rajvykankam taksama maje patrebu ŭ słužboŭcach. Upraŭleńniu pa sielskaj haspadarcy i charčavańni nie chapaje hałoŭnaha śpiecyjalista adździeła ekanomiki. Kandydatu abiacajuć płacić da 1120 rubloŭ. U jaho musić być 2 hady pracoŭnaha stažu i vyšejšaja adukacyja.
Doktaru-śpiecyjalistu ŭ rajonnuju bolnicu abiacajuć 1000 rubloŭ.
Psichanieŭrałahičny dom-internat dla sastarełych i invalidaŭ šukaje doktara-specyjalista na čverć staŭki za 220 rubloŭ.
Za 270 rubloŭ na paŭstaŭki šukajuć chormajstra dla kłubnaj sistemy rajona. U jaho maje być siaredniaja specyjalnaja adukacyja. A zahadčycy sielskaha doma kultury abiacajuć za poŭny pracoŭny dzień 678 rubloŭ.