Italjanskaja makarona pa canie jałavičyny. Jak ciapier vyhladajuć palicy ź jeŭrapiejskimi praduktami

U krasaviku zdaryŭsia abmien sankcyjami i kontrsankcyjami — u vyniku napružylisia pieravozčyki, biznes jakich ledź nie admianili, a razam ź imi — i amatary italjanskaj makarony i ispanskaha aliŭkavaha aleju. Imparciory abiacali: buduć dumać, jak pryvieźci novyja partyi, raniejšych zapasaŭ chopić minimum na miesiac, a to i na niekalki. Onliner acaniŭ, što źmianiłasia praz čatyry miesiacy.

31.08.2022 / 11:01

Jak ciapier jeduć jeŭrapiejskija tavary? U niekalkich transpartnych kampanijach vydańniu raskazali, što karystajucca schiemaj ź pieračepkaj: jeŭrapiejskija partniory pryvoziać hruzy ŭ transpartna-łahistyčnyja centry, adtul ich zabirajuć biełaruskija pieravozčyki. Na fonie hetych navin akazalisia vielmi zapatrabavanyja pasłuhi ekśpiedytaraŭ.

— Byli peŭnyja čakańni, što Kazachstan i Turcyja stanuć bujnymi łahistyčnymi chabami dla aŭtapieravozčykaŭ, ale hetaha nie adbyłosia. Rasija pieraaryjentavała tudy tolki kala 10% płyni, dla Biełarusi hetuju ličbu navat składana nazvać.

Z-za novaj łahistyki terminy i košt pieravozak vyraśli, ale prynamsi jość pracoŭnyja schiemy, jak ź Jeŭropy pryvieźci tavar u Biełaruś, kažuć u transpartnych kampanijach.

Jak ciapier vyhladajuć palicy ź jeŭrapiejskim impartam?

Kava

Na palicy z kavaj źniešnie ŭsio dobra, sumnych prabiełaŭ nie vidać (uličvajem, što tut, akramia inšaha, i impart z Rasii). U niekatoryja kramy ŭžo pryjechała rastvaralnaja kava pa novych koštach — tam u banačak załatyja nie tolki viečki, ale i źmieściva.

Ceńniki ŭ blašanak Illy takija ž, jak u krasaviku, asartymient navat dadaŭsia — pryčapicca niama da čaho.

U Dallmayr Prodomo taksama niaźmiennaść: 24,45 rubla za 250 hramaŭ (a voś vialiki pačak, padobna, pryjechaŭ pa novych cenach). Košt Dallmayr Classic krychu padros — z 27,08 rubla da 28,95. Lavazza na miescy ź nievialikimi vahańniami cenaŭ.

A voś amatary Starbucks mohuć zasumavać. U 450-hramovaha pačka Pike Place ŭ zierniach da cany dabaviłasia 30 pracentaŭ. Kali nie kupili pa 37,99 rubla, novy košt — 49,70.

Makarona

Tut dziasiatki impartnych brendaŭ, ale bolš za ŭsio rasijskich. Pa aficyjnaj statystycy, ź Italii pryjazdžała tolki 15% impartnaj makaronnaj palicy. Ciapier dola nieviadomaja, Biełstat bolš nie dzielicca statystykaj impartu/ekspartu.

Ź Jeŭropy da nas jechali zvykłyja spahieci i šmat modnych štuk, jakija nie impartazamiaścilisia: listy dla łazańni, fietučyni, taljatele, kalarovaja makarona, biez hlutenu.

Usie jany na miescy, mianiajucca tolki ceny, padsoŭvajučy makaronu ŭ razrad raskošnaj ježy. Mahčyma, biezhlutenavyja piory — adny ź niamnohich, jakija zachavali cenavuju stabilnaść.

Biezhlutenavyja spahieci ŭ dva razy daražejšyja — 15 rubloŭ za pačak.

Paŭkiłahrama italjanskich Delverde i tak kaštavali 11-12 rubloŭ — kudy im jašče daražeć? Pakul trymajucca.

A voś pryhoža zakručanyja fietučyni nie ŭtrymalisia, i ciapier jany abyducca amal u 32 rubli za kiłahram.

Łokšyna ŭ hniozdach dadała 35%. Padobna na rekord makaronnaj palicy.

Za dadatkovuju pryhažość kalarovaj makarony treba było addać 9,54 rubla — ciapier 12,40. Heta plus 30 pracentaŭ da cany. Kali pieravodzić u kiłahramy, to atrymlivajecca muka z vadoj pa košcie jałavičyny.

Jaječnaja makarona sa špinatam, makarona z hrybami — usio heta taksama vyrasła ŭ košcie na 30%.

Na palicy možna znajści rasijskuju i biełaruskuju makaronu ŭ rajonie 4 rubloŭ, ale vyhladaje, što treba pryvykać da novych cen na italjanskuju: mnohija hatunki pierasiahnuli adznaku 10 rubloŭ i viartacca ŭžo nie buduć.

Chacia i rasijskaja makarona padaražeła navat biez zabaron na miažy. Papularnyja spahieci Barilla zamiest 4 rubloŭ ciapier kaštujuć 4,90 (+22,5%).

Ryba

Niadaŭna žurnalisty razvažali, ci varta jeści čyrvonuju rybu ź Irana pa 32 rubli, kali ŭ jaje nie zusim zvykły smak. Dyk voś, handal praciahvaje ekśpierymientavać z krynicami impartu, a tyja — z koštami.

U vyniku na palicy materyjalizavałasia file łasosia z Šatłandyi za 77,90 rubla i stejki za 71,50. Kali dla vas heta šok, dyk jość stejki za 57,90 rubla, prosta mienšyja pa pamiery.

Čatyry miesiacy tamu ceny vyhladali bolš ścipłymi.

Aliŭkavy alej

Na palicy vyjaŭlajucca nie ŭsie znajomyja brendy, ale tut taksama niamu deficytu. Balzamik taksama prysutničaje.

Litr aliŭkavaha aleju za 50 rubloŭ? Hetym cenam dzivilisia jašče ŭ krasaviku, padobna, treba padychodzić da stadyi pryniaćcia.

Soki

Pakul biełaruskija i rasijskija soki i niektary na ŭsiu moc mianiali ŭpakoŭku Tetra Pak, ź jeŭrapiejskimi ničoha asabliva nie adbyvałasia, padaraželi na paru kapiejek.

I inšaje

Aliŭki na miescy, jašče pa krasavickich koštach.

Pakul chtości robić svajo vareńnie, francuzskaje staić na palicy z raniejšym ceńnikam. Hetamu možna radavacca, kali nie viedać košty na sajcie vytvorcy — € 3,30—3,40, abo praktyčna ŭ dva razy tańniej.

Padobna, samaja vialikaja abaračalnaść u palicy z makaronaj, tam rost koštaŭ najbolš prykmietny. Potym padaražeje i astatniaje? Imparciory kažuć, što sprava nie tolki ŭ bolš składanaj schiemie pierasiačeńnia miažy ES i Biełarusi:

ceny paśpieli padniacca jašče da krasavika. Pamiatajecie dołar i jeŭra na piku viasnoj? Voś pa takich kursach zakuplalisia i imparciory.
Novyja partyi — jak praviła, novyja ceny. Časam prachodzicca miksavać reštki pa starych i novych cenach i pradavać pa siarednich, kab zhładzić rost.
Inflacyja ŭ ES idzie ŭvierch, jeŭrapiejskija tavary dla ŭsich stanoviacca daražejšymi.
Jeŭra, jaki tańnieje, na situacyju z cenami dla nas hłabalna nie ŭpłyvaje.