Hazavy kryzis u Jeŭropie moža aznačać zvyšprybytki dla biełaruskich škłozavodaŭ
Sproba Rasii ŭdušyć Jeŭropu hazam vyklikaje rost koštu jeŭrapiejskaj škłotary i adkryvaje pryvabnyja pierśpiektyvy dla biełaruskich hutaŭ.
30.08.2022 / 10:06
Huta ŭ Hrodnie, vytvorčaja linija. Skrynšot ź videa.
Jeŭrapiejskija vytvorcy škła chočuć atrymlivać haz pa subsidavanych cenach u vypadku rezkaha rostu cen na jaho hetaj zimoj. Inakš brovary, viniarni i zavody ałkaholnych vyrabaŭ mohuć zastacca biez šklanoj tary, piša The Wall Street Journal.
U paniadziełak jeŭrapiejskija fjučersy na etałonny haz dasiahnuli rekordu paśla taho, jak stała viadoma, što hazapravod «Paŭnočny patok» pamiž Rasijaj i Hiermanijaj budzie začynieny na trochdzionnyja prafiłaktyčnyja pracy.
Biznes-koły dapuskajuć, što Maskva budzie vydumlać novyja i novyja padstavy dla skaračeńnia pastavak paliva ŭ Jeŭropu, zmušajučy ŭrady krain rehijona ŭvodzić abmiežavańni.
Siarod paciarpiełych — kampanii, jakija vyrablajuć napoi ŭ šklanoj tary. U ich jość reziervovyja płany dla ŭłasnych vytvorčych pracesaŭ: piŭnyja kampanii, jakija vykarystoŭvajuć haz dla nahrevu vady ŭ pracesie pivavarstva, mohuć časova pierajści na naftu. Z pačatku listapada kampanija Carlsberg zmoža zabiaśpiečyć pracu kala saraka svaich jeŭrapiejskich pivavarnych zavodaŭ na nafcie.
Vyrablać dastatkovuju kolkaść butelek moža być składaniej. Šklanaja pramysłovaść Jeŭropy ŭ značnaj stupieni zaležyć ad hazu, jaki vykarystoŭvajecca dla nahravańnia piečaŭ da 1400 hradusaŭ Celsija, kab vypłaŭlać škło.
Bolšaść hutaŭ nielha spynić, bo piečy złamajucca, kali raspłaŭlenaje škło zastynie ŭnutry ich, i mienavita tamu jany pracujuć bieśpierapynna na praciahu 10—15 hadoŭ. Ich možna pieravieści na «haračaje čakańnie» — stan, pry jakim materyjał ŭnutry zastajecca vadkim, ale heta ŭsio roŭna patrabuje da 75% zvyčajnaha spažyvańnia hazu pry adsutnaści vypusku škła.
Navat umieranaje skaračeńnie nie budzie idealnym rašeńniem. Skaračeńnie spažyvańnia hazu na 15 adsotkaŭ, uzrovień, da jakoha pavinny pryjści krainy-členy ES, moža pryvieści da padzieńnia vytvorčaści škła bolš čym udvaja, pa słovach adnaho sa śpiecyjalistaŭ haliny.
Vytvorcy škła łabirujuć pryjarytetny dostup da hazu i papiaredžvajuć ŭrady, što adklučeńnie jeŭrapiejskich piečaŭ i impart butelek źniščyć pramysłovyja aktyvy rehijonu. Ale i inšyja haliny taksama patrabujuć asablivaha staŭleńnia. Kampanii chimičnaj i farmaceŭtyčnaj pramysłovaści dakazvajuć, što jany vyrablajuć zychodnyja materyjały dla uhnajeńniaŭ i lekaŭ, jakija žyćciova važnyja dla charčovaj i miedycynskaj biaśpieki rehijona.
U Jeŭropie ŭžo adčuvajecca niedachop butelek. Ałkaholnyja kampanii zmahajucca za dastatkovuju kolkaść pastavak z tych časoŭ, jak u rehijonie znoŭ adkrylisia načnyja ŭstanovy. Pa miery taho jak pradpryjemstvy pierachodziać z płastykavaj tary na škło praz ekałahičnyja patrabavańni, kankurencyja za butelki ŭzmacniajecca.
Pa danych Jeŭrapiejskaj fiederacyi škłatary, u 2021 hodzie vytvorčaść škła pavialičyłasia na 5 pracentaŭ dziela vialikaha popytu, što bolš čym u dva razy pieravyšaje siarednija tempy rostu haliny za apošniaje dziesiacihodździe.
Dynamika vytvorčaści škła z 2016 pa 2021 hady. Fota: The Wall Street Journal
Niedachop škła abciažaryć ałkaholnym kampanijam stvareńnie zapasaŭ butelek napiaredadni zimy. Najbujniejšyja likiora-harełačnyja i pivavarnyja kampanii, takija jak Diageo i Heineken, imavierna, atrymajuć pryjarytetny dostup, bo jany klijenty premijalnyja, ale chutčej za ŭsio i jany buduć pierapłočvać.
Pa danych adnoj bujnoj ałkaholnaj kampanii, sabiekošt vytvorčaści adnoj butelki dla viski vyras z 30 centaŭ hod tamu da prykładna 45 centaŭ siońnia za košt rostu cen na haz.
Šklanaja tara składaje čverć sabiekoštu pradadzienych tavaraŭ ałkaholnych kampanij.
Situacyja, što z koštam škła pakazvaje, jakimi niepradkazalnymi mohuć być nastupstvy hazavaha kryzisu, padsumoŭvaje «Uoł-stryt džornał».
Rezki rost cenaŭ na škło moža prynieści zvyšprybytki biełaruskim škłozavodam.
Uzamien za palityčnuju zaležnaść ad Maskvy Biełaruś atrymlivaje pryrodny haz u maksimalnaj kolkaści pa fiksavanaj canie, jakaja na siońnia ŭžo prynamsi ŭ piać razoŭ mienšaja, čym tyja, pa jakich jaho atrymlivajuć jeŭrapiejcy. Heta robić sabiekošt biełaruskaj šklanoj tary nizkim. Kali biełaruskija pradpryjemstvy buduć mieć mahčymaść prodažu jaho na jeŭrapiejskim rynku, kali jany nie buduć padpadać pad sankcyi za saŭdzieł Biełarusi ŭ ahresii suprać Ukrainy, jany mohuć azałacicca na eksparcie pradukcyi ŭ Jeŭrasajuz.