«Turysty kažuć, što ŭ nas, jak u Jeŭropie, tamu i ceny na arendu — jeŭrapiejskija». Jak Hrodna pieražyvaje turystyčny bum
Ceny na pasutkavuju arendu kvater padskočyli, a minčuki natoŭpami jeduć u Hrodna dziela histaryčnaj spadčyny i abiedaŭ va ŭtulnych dvorykach.
21.08.2022 / 19:10
Arenda daražejšaja, čym u Minsku, Vilni ci Prazie?
Dniami na adnym z hrodzienskich haradskich partałaŭ źjaviŭsia artykuł, dzie turystka, jakaja naviedała horad, skardziłasia na vysokija ceny i nizki ŭzrovień servisu.
Asnoŭnyja pretenzii zaklučalisia ŭ tym, što ŭ horadzie nazirajucca prablemy z pošukam žytła. Usie numary ŭ haścinicach i chostełach zabraniravany, a ceny na pasutkavuju arendu kvater u Hrodnie, ź jaje słoŭ, ciapier vyšejšyja, čym u Minsku, Vilni ci Prazie. Na pieršy pozirk takoje paraŭnańnie vyhladaje pierabolšańniem, ale…
Jak vyśvietliłasia, prablemy z pošukam miesca dla načlehu ŭ horadzie sapraŭdy jość. Haścinicy i chosteły pa vychodnych całkam zaniatyja, tamu tym, chto nie paśpieŭ zabraniravać numar zahadzia, davodzicca šukać kvatery na sutki.
Booking.com u Biełarusi nie pracuje, praz heta šukać kvatery treba na roznych admysłovych sajtach. Ale prablema nie ŭ hetym. U abjavach arendadaŭcy prapisvajuć nie zusim tyja staŭki, pa jakich faktyčna možna zasialicca ŭ kvateru.
Fota: skrynšot z sajta realt.by
Za paznačanymi ŭ abjavie 50-70 rublami nasamreč chavajecca kudy bolš vysokaja cana, ale daviedacca pra jaje možna, tolki pračytaŭšy padrabiaznaści ŭ apisańni, abo vyklučna padčas telefonnaj razmovy.
«Cana zaležyć ad kolkaści pastajalcaŭ i sutak pražyvańnia (50 rubloŭ za adnaho pražyvajučaha, pry ŭmovie arendy na termin ad 15 dzion). U śviatočnyja i vychadnyja dni cana damoŭnaja», — havorycca ŭ apisańni da adnoj z kvater.
Fota: skrynšot z sajta realt.by
Na spravie za sutki pražyvańnia ŭ vychodnyja dni ad vas zapatrabujuć ad 150 rubloŭ.
Tak, naprykład, za dźvie nočy ŭ 1-2-pakajoŭcy z dobrym ramontam, jakaja mieścicca ŭ histaryčnym centry, daviadziecca vykłaści 350 rubloŭ. Niaredka haspadary takich kvater admaŭlajucca zdavać jaje tolki na adzin dzień, prapanujučy dva vychodnych «pakietam».
Krychu tańniej možna pasialicca ŭ spalnych rajonach, jakija znachodziacca adnosna blizka da centra. Takija varyjanty prapanujuć pa 150 rubloŭ za sutki, ci pa 300 za dva vychodnyja.
Adzinaja mahčymaść sekanomić na arendzie žytła — naviedvać horad u budnyja dni. Pa słovach ahientaŭ, tyja samyja kvatery, što ŭ vychodnyja zdajucca pa 150-180 rubloŭ u sutki, u pracoŭnyja dni možna arendavać pa staŭcy 80-100.
«Z druhoj pałovy červienia my pačali nazirać sapraŭdny turystyčny bum»
Nastolki zaŭvažnuju roźnicu ŭ cenach arendadaŭcy tłumačać vialikim napłyvam turystaŭ.
Adna z haspadyń takich kvater raspaviała «Našaj Nivie», što niešta padobnaje ŭ Hrodnie nazirajecca kožnaje leta, ale biahučy hod užo paśpieŭ stać asablivym.
«U pryncypie horad zaŭždy karystaŭsia vialikaj papularnaściu siarod turystaŭ, asabliva ŭ ciopły pieryjad, ale pryblizna z druhoj pałovy červienia my pačali nazirać sapraŭdny turystyčny bum.
Ciaham apošnich dvuch miesiacaŭ popyt tolki ros, a razam ź im rastuć i arendnyja staŭki. I prynamsi pakul źnižać ich nie maje sensu, bo i pa takim košcie na vychodnyja kvatery amal va ŭsich zabraniravanyja ŭžo na 2 tydni napierad.
Ludziam vielmi padabajecca naš horad, jany kažuć, što ŭ nas tut, jak u Jeŭropie, vidać, tamu i ceny na arendu ŭ nas jeŭrapiejskija», — žartuje žančyna.
Haspadynia apartamientaŭ kaža, što ŭžo ź vieraśnia chvala turystaŭ pastupova pačnie spadać, ale kali nadvorje budzie dobrym, to ŭ horad usio adno praciahnuć jechać u adpačynak.
Što tyčycca hieahrafii turystaŭ, to, pa słovach žančyny, sioleta, jak i letaś, bolšaść jaje pastajalcaŭ majuć biełaruski pašpart.
«U nas staŭ papularny ŭnutrany turyzm, bo ŭ papiarednija dva hady byli zakrytyja hranicy. Ciapier abmiežavańniaŭ niama, ale atrymać vizu składana i vielmi doraha, tamu ludzi padarožničajuć pa krainie. Naturalna, što ŭsim cikava źjeździć da nas, bo ŭ Hrodnie sapraŭdy jość na što pahladzieć. U dakavidnyja časy da nas jechała šmat litoŭcaŭ i palakaŭ, a ciapier heta ŭ asnoŭnym biełarusy, rasijanie taksama jeduć, ale ich usio adno nie vielmi šmat», — zaŭvažaje surazmoŭca.
Turystaŭ ź ES zamianili biełarusy i rasijanie
Naturalna, što viarški z turystaŭ zdymajuć nie tolki tyja haradziency, jakija zdajuć žytło. Značnaje pavieličeńnie turystaŭ na sabie adčuvajuć i miascovyja ekskursavody.
Adzin z hrodzienskich hidaŭ raspavioŭ «Našaj Nivie», što horad, pa nazirańniach, narešcie viarnuŭsia na dakavidnyja abjomy. (U 2019 hodzie tolki ŭ ramkach biaźvizavaha režymu Hrodna i najbližejšyja rehijony naviedała 136 tysiač turystaŭ.)
«Apošni raz my niešta padobnaje bačyli ŭ 2019 hodzie, kali pa horadzie ŭ pramym sensie słova chadzili natoŭpy turystaŭ, a na parkoŭcy dla turystyčnych aŭtobusaŭ nie chapała miesca dla ŭsich achvotnych. Nie vyklučaju, što pad kaniec leta ludziej pačało pryjazdžać u horad navat bolš, čym da pandemii», — kaža ekskursavod.
Pa jahonych nazirańniach, asnoŭnaje adroźnieńnie 2019 hoda ad 2022-ha zaklučajecca ŭ tym, što ŭ dakavidnyja časy bolšaść turystaŭ pryjazdžała ŭ horad z Zachadu, a ciapier z Uschodu.
«Navat tatalny biaźviz nie paspryjaŭ tamu, kab adnaviŭsia patok turystaŭ ź ES. Raniej da nas pryjazdžała vielmi šmat litoŭcaŭ i palakaŭ, ciapier takoha niama.
Z Polščy ŭvohule amal nichto da nas u turystyčnych metach nie jedzie. Byvajuć hrupy ź Litvy i Łatvii, ale heta daloka nie toje, što było 3-4 hady tamu. Ciapier asnoŭnyja turysty — heta biełarusy i rasijanie, apošnich stała zaŭvažna bolš, čym było ŭ papiarednija hady».
«Minčukam padabajucca našy staryja atmaśfiernyja dvoryki»
Ułaśniki kaviarniaŭ u centry taksama rady tamu, što ŭ horad jedzie šmat turystaŭ.
«U tym liku dziakujučy turystam u našym horadzie pastajanna adkryvajucca novyja ŭstanovy, za apošnija 3-5 hod Hrodna vielmi mocna prasunuŭsia ŭ hetym kirunku. Ja viedaju, što da nas pryjazdžaje šmat haściej ź Minska, i navat raśpieščanyja žychary stalicy chvalać našy ŭstanovy hramadskaha charčavańnia, im padabajucca našy staryja atmaśfiernyja dvoryki.
Hrodna pačynaje zavajoŭvać słavu nie tolki samaha pryhožaha horada krainy, ale i miesca, kudy možna źjeździć, kab smačna pajeści i patusavacca ŭ raznastajnych cikavych ustanovach», — śćviardžaje adzin ź miascovych restarataraŭ.