Valeryj Capkała vyrašyŭ ckavać niazhodnych ź im žurnalistaŭ — pačaŭ sa Źmitra Łukašuka
Na kanfierencyi «Novaja Biełaruś» Vieranika Capkała ahučyła namiery stvaryć kamitet kantrolu za niezaležnymi miedyja. Siarod pretenzij — niedastatkovaje aśviatleńnie dziejnaści jaje muža. Ale Valeryj Capkała, padobna, vyrašyŭ nie čakać stvareńnia kamiteta i prosta staŭ kpić z žurnalistaŭ, ź jakimi niazhodny.
16.08.2022 / 09:19
Skrynšot: jutub-kanał Valeryja Capkały
«Hałoŭnym voraham» jon vybraŭ viadučaha žurnalista «Jeŭraradyjo» Źmitra Łukašuka.
U telehram-kanale byłoha kiraŭnika PVT i ŭdzielnika vybarčaj kampanii — 2020 stali źjaŭlacca pasty z vyśmiejvańniem viadučaha strymaŭ. Heta dopisy i samoha Capkały, i małapapularnych satyryčnych kanałaŭ.
Capkała nazyvaje žurnalista Ryhoram Łukašukom (pa anałohii z Ryhoram Azaronkam), abvinavačvajučy jaho ŭ nieabjektyŭnaści i prapahandzie na karyść Łukašenki i Cichanoŭskaj.
Źmicier Łukašuk ŭ pačatku žniŭnia braŭ intervju i ŭ Valeryja Capkały. Na pytańnie, čym jon zajmaŭsia apošni hod, palityk u pieršuju čarhu adznačyŭ, što z pačatku vajny daŭ kala 30 intervju ŭkrainskim ŚMI, zapuściŭ sajt, źbiraŭ hrošy na aryšt Łukašenki i prapanavaŭ jašče šerah inicyjatyŭ, jakija nie byli šyroka padtrymany.
Nahadajem, na kanfierencyi «Novaja Biełaruś» u Vilni Vieranika Capkała zajaviła, što ŭ ciapierašni momant hrupa aktyvistaŭ, blizkaja da štabu Capkały, robić kantent-analiz biełarusich niedziaržaŭnych ŚMI na pradmiet zhadak roznych palityčnych sił. Kali akažacca, što ŭ asobnym ŚMI daminuje pazicyja tolki adnoj palityčnaj płyni, to jana źbirajecca napisać listy da kiraŭnikoŭ zachodnich dziaržaŭ i fondaŭ z patrabavańniem spynić finansavańnie i padtrymku hetaha ŚMI.