Kolki kaštuje navučańnie ŭ jeŭrapiejskich univiersitetach?
Niadaŭna biełaruskija ŭniviersitety padniali ceny na navučańnie. Pahladzieli, za jakija hrošy prapanoŭvajuć atrymać adukacyju ŭ VNU Jeŭropy.
03.08.2022 / 11:48
U mnohich univiersitetach Jeŭropy dziejničajuć stypiendyjalnyja prahramy. Jany, jak praviła, praduhledžvajuć vypłatu hrašovych srodkaŭ za dasiahnutyja ŭ vučobie pośpiechi. Pamier štomiesiačnych stypiendyj zaležyć ad zasłuh kankretnaha studenta i jahonaha talentu. Ale tak ci inakš hetaja hrašovaja dapamoha tolki častkova pakryvaje vydatki na navučańnie.
Inšy vid finansavaj padtrymki — hranty — dajecca zvyčajna pryvatnymi i dziaržaŭnymi fondami na konkursnaj i biazvypłatnaj asnovie ŭ vyhladzie adnarazovaj vypłaty. Pamier atrymanych takim sposabam srodkaŭ, jak praviła, dastatkovy dla poŭnaha pakryćcia zatrat na navučańnie ŭ VNU.
Polšča
Varšaŭski ŭniviersitet — hod navučańnia kaštuje ad 2000 da 5200 jeŭra ŭ zaležnaści ad śpiecyjalnaści.
Va ŭniviersitecie dziejničaje fakultet humanitarnych navuk, bijałohii, chimii, žurnalistyki i palityčnych navuk, fiłasofii i sacyjałohii, hieahrafii i rehijanalistyki, hieałohii, histaryčny, prykładnoj linhvistyki, matematyki, infarmatyki i miechaniki, ekanamičnych navuk, nieafiłałohii, aryjentalistyki, piedahahičny, polskaj fiłałohii, prava i administracyi, prykładnoha hramadaznaŭstva i resacyjalizacyi, mieniedžmientu i inšyja.
Fota: eurostudy
Tak, naprykład, za navučańnie na fakultecie žurnalistyki i palityčnych navuk treba budzie zapłacić ad 2000 da 3000 jeŭra ŭ zaležnaści ad śpiecyjalnaści.
Advučycca na chimika možna za 5200 jeŭra ŭ hod, a na historyka — za 2000. Kali pa śpiecyjalnaści «historyja mastactvaŭ», to za 3300 jeŭra.
Taksama možna vybrać movu, na jakoj budzie vieścisia vykładańnie: polskuju ci anhielskuju.
Univiersitet Mikałaja Kapiernika ŭ Torunie — ad 600 da 2200 jeŭra.
Fakultety: bijałohii i achovy navakolnaha asiarodździa, chimii, fiłałahičny, fiziki, astranomii i prykładnoj infarmatyki, humanitarnych navuk, matematyki i infarmatyki, ekanomiki i kiravańnia, histaryčny, piedahohiki, mastackich navuk i inšyja.
Tak, naprykład, navučańnie na archieołaha budzie kaštavać 600 jeŭra ŭ hod. Atrymać adukacyju psichołaha možna za 1300 jeŭra, a dyzajniera interjera — za 2200.
Fota: studytoeu
Navučańnie na polskaj abo anhielskaj movach.
Hdański ŭniviersitet — ad 2000 da 3500 jeŭra ŭ hod.
Fakultety: bijałohii, bijatechnałohii, chimii, ekanomiki, historyi, fiłałohii, matematyki, fiziki i infarmatyki, hramadskich navuk, akijanahrafii i hieahrafii, prava i kiravańnia, mieniedžmientu.
Fota: polonista center
Tak, naprykład, za navučańnie na fakultecie ekanomiki treba budzie płacić 3000 jeŭra ŭ hod, histaryčnym — 2000.
Navučańnie na polskaj abo anhielskaj movach.
Va ŭniviersitetach Polščy raspaŭsiudžany stypiendyjalnyja prahramy i hranty. Naprykład, prahrama polskaha ŭrada. Dla studentaŭ, jakija byli adličany z VNU ŭ Biełarusi pa palityčnych matyvach dziejničaje stypiendyjalnaja prahrama Kastusia Kalinoŭskaha.
Litva
Vilenski ŭniviersitet — ad 2700 da 12960 jeŭra ŭ hod.
Prahramy navučańnia: buchhałtarski ŭlik i aŭdyt, ekanomika, anhlijskaja fiłałohija, anhlijskaja i inšaja zamiežnaja mova (niamieckaja ci ruskaja), finansavaja matematyka, niamieckaja fiłałohija, hłabalny markietynh, infarmacyjnyja sistemy i kibierbiaśpieka, mižnarodny biznes i inšyja.
Fota: sacsietki
Tak, navučańnie na prahramie finansavaja matematyka budzie kaštavać 3524 jeŭra ŭ hod, mieniedžmient — 2760, stamatałohija — 11000, miedycyna — 12960 jeŭra.
Navučańnie viadziecca na anhielskaj movie.
Jeŭrapiejski humanitarny ŭniviersitet u Vilni — ad 1200 da 1600 jeŭra za siemiestr dla hramadzian Biełarusi i Ukrainy.
Prahramy: «Vizualny dyzajn», «Jeŭrapiejskaja spadčyna», «Miedyja i kamunikacyja», «Suśvietnaja palityka i ekanomika», «Teatralnaje mastactva i akciorskaja ihra», «Mižnarodnaje prava i prava Jeŭrapiejskaha sajuza», «Infarmatyka».
Fota: EHU
Navučańnie, naprykład, na prahramie «Miedyja i kamunikacyja» budzie kaštavać 1250 jeŭra ŭ hod, «Teatralnaje mastactva i akciorskaja ihra» — 1500.
Navučańnie prachodzić na ruskaj, anhielskaj, biełaruskaj movach.
Univiersitet Vitaŭta Vialikaha ŭ Kaŭnasie — ad 2628 da 7608 jeŭra ŭ zaležnaści ad śpiecyjalnaści.
Tut jość fakultet mastactvaŭ, palityčnych navuk i dypłamatyi, sacyjalnych navuk, prava, zamiežnych moŭ, fakultet lesu i ekałohii i inšyja.
Fota: univero.cc
Atrymać adukacyju pa prahramie «Biznes i administravańnie» možna za 2628 jeŭra ŭ hod, «Bijałohija i hienietyka» — 3426, «Muzyčnaja vytvorčaść» — 7608.
Navučańnie na litoŭskaj ci anhielskaj movach.
Vučycca biaspłatna ŭ Litvie — realny varyjant, ale vyklučna dla tych, chto vałodaje vydatnymi zdolnaściami. Inšaziemcam pa rašeńni ŭrada Litvy abo vykładčykaŭ i kiraŭnictva VNU moža być prapanavana navučańnie na biaspłatnaj asnovie.
Dla biełaruskich studentaŭ, jakija byli adličany ŭ Biełarusi pa palityčnych matyvach, dziejničajuć hranty ŭ Jeŭrapiejskim humanitarnym univiersitecie. Jany pakryvajuć košt navučańnia ŭ VNU.
Hiermanija
U Svabodnym univiersitecie Bierlina bolšaść prahram navučańnia biaspłatnyja, studenty apłačvajuć tolki siemiestravy ŭznos — kala 320 jeŭra.
Fota: dyvys.org
Fakultety: bijałohii, chimii, farmaceŭtyki, prava, ekanomiki, fiziki, vieterynarnaj miedycyny, piedahohiki i psichałohii, historyi i kultury, matematyki i infarmatyki i inšyja.
Navučańnie viadziecca na niamieckaj i anhielskaj movach.
Miunchienski techničny ŭniviersitet — navučańnie biaspłatnaje, studenty apłačvajuć tolki siemiestravy ŭznos — kala 130 jeŭra.
Jość architekturny fakultet, elektratechniki i infarmacyjnych technałohij, piedahohiki, mieniedžmientu, miedycyny, sportu i achovy zdaroŭja i inšyja.
Fota: sacsietki
Navučańnie viadziecca na niamieckaj i anhielskaj movach.
Hamburhski ŭniviersitet — navučańnie biaspłatnaje, studenty apłačvajuć tolki siemiestravy ŭznos — kala 335 jeŭra.
Fota: wegstudents.com
Fakultety: prava, biznesu, ekanomiki i sacyjalnych navuk, miedycynski, piedahahičny, humanitarny, matematyki, infarmatyki i pryrodaznaŭčych navuk, psichałohii, biznes-administravańnia.
Navučańnie viadziecca na niamieckaj i anhielskaj movach.
VNU Hiermanii dajuć stypiendyi na konkursnaj asnovie, a hranty atrymać značna składaniej, čym stypiendyi. Raspaŭsiudžanaj źjaŭlajecca nacyjanalnaja stypiendyja Hiermanii (300 jeŭra).
Čechija
Karłaŭ univiersitet u Prazie — na češskaj movie biaspłatna, na anhielskaj — ad 2000 jeŭra na hod.
Fota: sacsietki
Va ŭniviersitecie dziejničajuć fakultet fiłasofii, miedycynski, jurydyčny, piedahahičny, sacyjalnych navuk, teałahičny (husicki, pratestancki, katalicki), humanitarny, pryrodaznaŭčy, fizika-matematyčny i inšyja.
Masarykaŭ univiersitet u Brno — navučańnie, jakoje viadziecca na češskaj movie, biaspłatnaje. Druhaja mova navučańnia — anhielskaja, ceny — ad 2000 da 12700 jeŭra za hod.
Fota: gostudy.cz
Fakultety: jurydyčny, miedycynski, pryrodaznaŭstva, fiłasofski, piedahahičny, ekanomiki i kiravańnia, infarmatyki, sacyjalnych navuk, sportu.
Češski techničny ŭniviersitet u Prazie — navučańnie na anhielskaj movie kaštuje ad 3200 pa 5200 jeŭra ŭ hod, na češskaj — biaspłatna.
Fota: gostudy.cz
Fakultety: architektury, bijamiedycynskaj inžynieryi, elektratechniki, budaŭničy, jadzierny i fizika-inžynierny, mašynabudaŭničy, infarmacyjnych technałohij.
U Čechii va ŭniviersitetach taksama dziejničajuć hranty i stypiendylnyja prahramy. Padrabiazna aznajomicca ź imi možna tut.
***
Navučańnie ŭ minskich univiersitetach (naprykład, BDU, BDUIRy, MDŁU, BNTU) dla płatnikaŭ na pieršym kursie kaštuje ad 3500 da 5560 rubloŭ. U VNU inšych biełaruskich haradoŭ ceny, viadoma, nižejšyja.