Колькі каштуе навучанне ў еўрапейскіх універсітэтах?
Нядаўна беларускія ўніверсітэты паднялі цэны на навучанне. Паглядзелі, за якія грошы прапаноўваюць атрымаць адукацыю ў ВНУ Еўропы.
03.08.2022 / 11:48
У многіх універсітэтах Еўропы дзейнічаюць стыпендыяльныя праграмы. Яны, як правіла, прадугледжваюць выплату грашовых сродкаў за дасягнутыя ў вучобе поспехі. Памер штомесячных стыпендый залежыць ад заслуг канкрэтнага студэнта і ягонага таленту. Але так ці інакш гэтая грашовая дапамога толькі часткова пакрывае выдаткі на навучанне.
Іншы від фінансавай падтрымкі — гранты — даецца звычайна прыватнымі і дзяржаўнымі фондамі на конкурснай і бязвыплатнай аснове ў выглядзе аднаразовай выплаты. Памер атрыманых такім спосабам сродкаў, як правіла, дастатковы для поўнага пакрыцця затрат на навучанне ў ВНУ.
Польшча
Варшаўскі ўніверсітэт — год навучання каштуе ад 2000 да 5200 еўра ў залежнасці ад спецыяльнасці.
Ва ўніверсітэце дзейнічае факультэт гуманітарных навук, біялогіі, хіміі, журналістыкі і палітычных навук, філасофіі і сацыялогіі, геаграфіі і рэгіяналістыкі, геалогіі, гістарычны, прыкладной лінгвістыкі, матэматыкі, інфарматыкі і механікі, эканамічных навук, неафілалогіі, арыенталістыкі, педагагічны, польскай філалогіі, права і адміністрацыі, прыкладнога грамадазнаўства і рэсацыялізацыі, менеджменту і іншыя.
Фота: eurostudy
Так, напрыклад, за навучанне на факультэце журналістыкі і палітычных навук трэба будзе заплаціць ад 2000 да 3000 еўра ў залежнасці ад спецыяльнасці.
Адвучыцца на хіміка можна за 5200 еўра ў год, а на гісторыка — за 2000. Калі па спецыяльнасці «гісторыя мастацтваў», то за 3300 еўра.
Таксама можна выбраць мову, на якой будзе весціся выкладанне: польскую ці ангельскую.
Універсітэт Мікалая Каперніка ў Торуне — ад 600 да 2200 еўра.
Факультэты: біялогіі і аховы навакольнага асяроддзя, хіміі, філалагічны, фізікі, астраноміі і прыкладной інфарматыкі, гуманітарных навук, матэматыкі і інфарматыкі, эканомікі і кіравання, гістарычны, педагогікі, мастацкіх навук і іншыя.
Так, напрыклад, навучанне на археолага будзе каштаваць 600 еўра ў год. Атрымаць адукацыю псіхолага можна за 1300 еўра, а дызайнера інтэр'ера — за 2200.
Фота: studytoeu
Навучанне на польскай або ангельскай мовах.
Гданьскі ўніверсітэт — ад 2000 да 3500 еўра ў год.
Факультэты: біялогіі, біятэхналогіі, хіміі, эканомікі, гісторыі, філалогіі, матэматыкі, фізікі і інфарматыкі, грамадскіх навук, акіянаграфіі і геаграфіі, права і кіравання, менеджменту.
Фота: polonista center
Так, напрыклад, за навучанне на факультэце эканомікі трэба будзе плаціць 3000 еўра ў год, гістарычным — 2000.
Навучанне на польскай або ангельскай мовах.
Ва ўніверсітэтах Польшчы распаўсюджаны стыпендыяльныя праграмы і гранты. Напрыклад, праграма польскага ўрада. Для студэнтаў, якія былі адлічаны з ВНУ ў Беларусі па палітычных матывах дзейнічае стыпендыяльная праграма Кастуся Каліноўскага.
Літва
Віленскі ўніверсітэт — ад 2700 да 12960 еўра ў год.
Праграмы навучання: бухгалтарскі ўлік і аўдыт, эканоміка, англійская філалогія, англійская і іншая замежная мова (нямецкая ці руская), фінансавая матэматыка, нямецкая філалогія, глабальны маркетынг, інфармацыйныя сістэмы і кібербяспека, міжнародны бізнэс і іншыя.
Фота: сацсеткі
Так, навучанне на праграме фінансавая матэматыка будзе каштаваць 3524 еўра ў год, менеджмент — 2760, стаматалогія — 11000, медыцына — 12960 еўра.
Навучанне вядзецца на ангельскай мове.
Еўрапейскі гуманітарны ўніверсітэт у Вільні — ад 1200 да 1600 еўра за семестр для грамадзян Беларусі і Украіны.
Праграмы: «Візуальны дызайн», «Еўрапейская спадчына», «Медыя і камунікацыя», «Сусветная палітыка і эканоміка», «Тэатральнае мастацтва і акцёрская ігра», «Міжнароднае права і права Еўрапейскага саюза», «Інфарматыка».
Фота: EHU
Навучанне, напрыклад, на праграме «Медыя і камунікацыя» будзе каштаваць 1250 еўра ў год, «Тэатральнае мастацтва і акцёрская ігра» — 1500.
Навучанне праходзіць на рускай, ангельскай, беларускай мовах.
Універсітэт Вітаўта Вялікага ў Каўнасе — ад 2628 да 7608 еўра ў залежнасці ад спецыяльнасці.
Тут ёсць факультэт мастацтваў, палітычных навук і дыпламатыі, сацыяльных навук, права, замежных моў, факультэт лесу і экалогіі і іншыя.
Фота: univero.cc
Атрымаць адукацыю па праграме «Бізнэс і адміністраванне» можна за 2628 еўра ў год, «Біялогія і генетыка» — 3426, «Музычная вытворчасць» — 7608.
Навучанне на літоўскай ці ангельскай мовах.
Вучыцца бясплатна ў Літве — рэальны варыянт, але выключна для тых, хто валодае выдатнымі здольнасцямі. Іншаземцам па рашэнні ўрада Літвы або выкладчыкаў і кіраўніцтва ВНУ можа быць прапанавана навучанне на бясплатнай аснове.
Для беларускіх студэнтаў, якія былі адлічаны ў Беларусі па палітычных матывах, дзейнічаюць гранты ў Еўрапейскім гуманітарным універсітэце. Яны пакрываюць кошт навучання ў ВНУ.
Германія
У Свабодным універсітэце Берліна большасць праграм навучання бясплатныя, студэнты аплачваюць толькі семестравы ўзнос — каля 320 еўра.
Фота: dyvys.org
Факультэты: біялогіі, хіміі, фармацэўтыкі, права, эканомікі, фізікі, ветэрынарнай медыцыны, педагогікі і псіхалогіі, гісторыі і культуры, матэматыкі і інфарматыкі і іншыя.
Навучанне вядзецца на нямецкай і ангельскай мовах.
Мюнхенскі тэхнічны ўніверсітэт — навучанне бясплатнае, студэнты аплачваюць толькі семестравы ўзнос — каля 130 еўра.
Ёсць архітэктурны факультэт, электратэхнікі і інфармацыйных тэхналогій, педагогікі, менеджменту, медыцыны, спорту і аховы здароўя і іншыя.
Фота: сацсеткі
Навучанне вядзецца на нямецкай і ангельскай мовах.
Гамбургскі ўніверсітэт — навучанне бясплатнае, студэнты аплачваюць толькі семестравы ўзнос — каля 335 еўра.
Фота: wegstudents.com
Факультэты: права, бізнэсу, эканомікі і сацыяльных навук, медыцынскі, педагагічны, гуманітарны, матэматыкі, інфарматыкі і прыродазнаўчых навук, псіхалогіі, бізнэс-адміністравання.
Навучанне вядзецца на нямецкай і ангельскай мовах.
ВНУ Германіі даюць стыпендыі на конкурснай аснове, а гранты атрымаць значна складаней, чым стыпендыі. Распаўсюджанай з'яўляецца нацыянальная стыпендыя Германіі (300 еўра).
Чэхія
Карлаў універсітэт у Празе — на чэшскай мове бясплатна, на ангельскай — ад 2000 еўра на год.
Фота: сацсеткі
Ва ўніверсітэце дзейнічаюць факультэт філасофіі, медыцынскі, юрыдычны, педагагічны, сацыяльных навук, тэалагічны (гусіцкі, пратэстанцкі, каталіцкі), гуманітарны, прыродазнаўчы, фізіка-матэматычны і іншыя.
Масарыкаў універсітэт у Брно — навучанне, якое вядзецца на чэшскай мове, бясплатнае. Другая мова навучання — ангельская, цэны — ад 2000 да 12700 еўра за год.
Фота: gostudy.cz
Факультэты: юрыдычны, медыцынскі, прыродазнаўства, філасофскі, педагагічны, эканомікі і кіравання, інфарматыкі, сацыяльных навук, спорту.
Чэшскі тэхнічны ўніверсітэт у Празе — навучанне на ангельскай мове каштуе ад 3200 па 5200 еўра ў год, на чэшскай — бясплатна.
Фота: gostudy.cz
Факультэты: архітэктуры, біямедыцынскай інжынерыі, электратэхнікі, будаўнічы, ядзерны і фізіка-інжынерны, машынабудаўнічы, інфармацыйных тэхналогій.
У Чэхіі ва ўніверсітэтах таксама дзейнічаюць гранты і стыпендыльныя праграмы. Падрабязна азнаёміцца з імі можна тут.
***
Навучанне ў мінскіх універсітэтах (напрыклад, БДУ, БДУІРы, МДЛУ, БНТУ) для платнікаў на першым курсе каштуе ад 3500 да 5560 рублёў. У ВНУ іншых беларускіх гарадоў цэны, вядома, ніжэйшыя.