«Žančyna pry hrošach» — lohkaja, jarkaja i kranalnaja kamiedyja pra padmanutuju žonku miljardera
Kali vy šukajecie lohki, śmiešny i pry hetym nie durny sieryjał, źviarnicie ŭvahu na hetuju navinku ad Apple TV+. Maja Rudolf dobra hraje, a siužet zaciahvaje.
23.07.2022 / 09:51
Fota: Apple TV+
Vierahodna, nie kožny zrazumieje dušeŭnyja muki nastolki nieprystojna zamožnaj miljarderki, što jana zajmaje treciaje miesca pa bahaćci siarod žančyn u ZŠA. Tym nie mienš, «Žančyna pry hrošach» — sieryjał, jaki prymusić vas pa-sapraŭdnamu spačuvać hałoŭnaj hierainie. I ŭsio praz tuz u rukavie — aktrysu Maju Rudolf, jakaja hraje Moli Novak (paźniej Uełs), žančynu, što chutka stanie adnoj z samych viadomych padmanutych žonak u zachodnim śviecie, piša Guardian.
Moli zamužam za technamahnatam Džonam Novakam (Adam Skot, zorka ofisnaha sieryjała «Raździaleńnie»), i ŭsio jaje žyćcio napoŭniena raskošaj i bahaćciem. Jany žyvuć u vielizarnym asabniaku, płavajuć na jachtach z basiejnam, a na dni naradžeńnia Moli vystupaje pop-zorka minułaha Sił.
Kali Moli razumieje, što jaje technamahnat mieŭ suviaź z maładziejšaja žančynaj, jana pakidaje svoj dom (i šlub) na jarkim luksavym aŭtamabili i zarablaje na razvodzie 87 miljardaŭ dalaraŭ. Dalej narešcie volnaja Moli padarožničaje pa viečarynach ad Rya da Pchukieta i sprabuje naviarstać tam tuju šalonuju maładość, jakoj u jaje nikoli nie było.
A potym prychodzić asensavańnie, i novaśpiečanaja Moli Uełs pačynaje šukać sens novaha žyćcia. Jana daviedvajecca, što isnuje dabračynny fond, zasnavany ad jaje imia i na jaje hrošy. I chacia Moli daŭno nie pracavała, jana vyrašaje, što zaraz samy čas viarnucca ŭ ofis i pačać zajmacca svaim fondam.
Ź pieršaha pohladu «Žančyna pry hrošach» vyhladaje satyraj na zvyšbahatych. Ale aŭtary nie spyniajucca na hetym i pieratvarajuć stužku ŭ miłuju kamiedyju. Moli — hłuchaja i adarvanaja ad realnaści pradstaŭnica elity, i jaje sproby paŭdzielničać u pracy fondu prosta žachlivyja. Čaho tolki vartaja jaje pramova na adkryćci prytułku dla biazdomnych — jana prymusić vas adčuć sapraŭdny soram za eks-žonku technamahnata.
I ŭsio roŭna sieryjał zrobleny ź vialikim hustam. Sapraŭdnaja kiraŭnica fondu Safija — hołas razumu va ŭsioj hetaj situacyi i čałaviek, jaki sprabuje ŭraŭnavažyć dziŭnyja ŭčynki Moli. Vam spadabajecca toje, jak jana adkazvaje na doŭhi i emacyjny raspovied miljarderšy pra jaje žyćciovyja straty: «Prabačcie, mianie heta nie chvaluje». Idealnaja intanacyja dla hutarki z bahačkaj.
Biez Mai Rudolf hety sieryjał nie spracavaŭ by, ale ž nie tolki jana — sakret jaho efiektyŭnaści. Ale ž Moli pavinna zrazumieć, što jana — nie centr suśvietu, i akciory druhoha płana stvarajuć piersanažaŭ, jakija zdolnyja dapamahčy Moli ŭ hetym. U «Žančynie pry hrošach» jość svoj humar (zhadajem chacia b scenu, dzie Moli pajadaje kurynyja krylcy), ale jość i kranalnyja momanty.
Sieryjał dobra raskazvaje pra siabroŭstva, u im navat jość namioki na ramantyčnuju liniju, chacia jana tam i nie hałoŭnaja. U vyniku my majem stužku pra drennaha (ci vielmi naiŭnaha) čałavieka, jaki prosta žadaje stać lepšym. Usiaho hetaha dastatkova dla taho, kab pad kaniec sieryjała vy pačali pa-sapraŭdnamu pieražyvać za jaho hierojaŭ.
Rejtynhi na vialikich suśvietnych resursach:
IMDB — 6,3 / 10
Rotten Tomatoes — 81%