Ekśpiert: Ukrainskija bieśpiłotniki chutka mohuć stać bieskarysnymi, a voś rasijanie naroščvajuć svaju pieravahu
U pieršyja dni vajny va Ukrainie bieśpiłotniki pakazali siabie jak niečakanuju pieravahu nad rasijskimi vojskami. Ale cud-zbroja Ukrainy stanovicca ŭsie mienš efiektyŭnaj. Vajenny ekśpiert tłumačyć, čamu tak adbyvajecca.
05.07.2022 / 16:07
Ukrainski Bajraktar padčas vajskovaha paradu ŭ Kijevie. 20 žniŭnia 2021 hoda. Fota: Associated Press
Bieśpiłotnaja avijacyja Ukrainy, ad nievialikich spažyvieckich dronaŭ, jakija zvyčajna vykarystoŭvajucca dla nazirańnia, da znakamitych tureckich bieśpiłotnikaŭ Bayraktar TB2, zasłužyła nazvu «źniščalnikaŭ pucinskich tankaŭ».
Adnak Rasija zasvoiła ŭroki z taho prynižeńnia, jakoje joj nanieśli bieśpiłotniki ŭ pieršyja miesiacy ŭvarvańnia. U hutarcy z Insider ekśpierty acanili, što jany stali mienš efiektyŭnymi. Rasija ŭdaskanaliła svaju abaronu i moža źbivać i hłušyć usio bolš i bolš ukrainskich bieśpiłotnikaŭ.
Rasijskaja abarona arhanizavanaja lepš
— Radyjoelektronnaja i supraćpavietranaja abarona Rasii ciapier arhanizavanaja i abstalavanaja lepš, čym u pieršyja miesiacy vajny, — kaža Samuel Biendet, analityk i ekśpiert pa bieśpiłotnych i rabatyzavanych vajennych sistemaŭ z Centra vajenna-marskoha analizu.
Rasijskija siły vykarystoŭvajuć radary rańniaha papiaredžańnia dla identyfikacyi bieśpiłotnikaŭ i sistemy radyjoelektronnaj baraćby dla hłušeńnia i parušeńni ich suviazi.
Kab źbivać bieśpiłotniki, jany taksama vykarystoŭvajuć roznyja vidy zbroi, takija jak kulamioty i sistemy supraćpavietranaj abarony, naprykład, rakietny kompleks «Tor».
Niadaŭnija kadry Ministerstva abarony Rasii pakazvajuć sistemu radyjoelektronnaj achovy «Krasucha-S4» u dziejańni. Na kadrach vidać źbity ŭkrainski bieśpiłotnik. Rasija palepšyła strukturu i razhortvańnie naziemnaj supraćpavietranaj abarony ŭ rehijonie Danbasa, kudy źmiaściŭsia fokus vajny.
Ciapier ukrainskija vojski abmiažoŭvajuć vykarystańnie bieśpiłotnikaŭ, bo rasijskim vojskam lahčej ich strymlivać, a strata bieśpiłotnikaŭ moža kaštavać vielmi doraha.
Kali adnarazovyja drony, jak Switchblade i Phoenix Ghost, kaštujuć niekalki tysiač dołaraŭ za štuku, to Bajraktary mohuć kaštavać ad adnaho da dvuch miljonaŭ.
Rasija źbivaje ŭkrainskija bieśpiłotniki
Z pačatku rasijskaha ŭvarvańnia Ukraina atrymała blizu 50 bieśpiłotnikaŭ TB2 ad tureckaj kampanii Baykar. Vielmi efiektyŭnyja ŭ pieršyja dni vajny, TB2 stali źbivacca Rasijaj, i ŭkrainskaja armija ciapier abmiažoŭvaje ich vykarystańnie.
Niadaŭna stała viadoma, što ZŠA płanujuć pradać Ukrainie ŭzbrojenyja bieśpiłotniki MQ-1C Gray Eagle vytvorčaści General Atomics. Miarkujecca, što jany vałodajuć bolšymi mahčymaściami, čym Bajraktary.
Ale dva nienazvanyja piłoty ŭkrainskich VPS paviedamili vydańniu The War Zone, što jany nie padtrymlivajuć pieradaču bieśpiłotnikaŭ z-za ich vysokaha koštu (10 miljonaŭ dołaraŭ za štuku). Jany taksama čakajuć, što aparaty buduć źbityja padčas ich pieršaj misii.
Pa słovach Marka Kansiana, ekśpierta Centra stratehičnych i mižnarodnych daśledavańniaŭ, rakiety siaredniaj dalokaści i bieśpiłotniki asabliva ŭraźlivyja, bo lotajuć nizka i pavolna.
— Ukrainskija piłoty, ź jakimi ja razmaŭlaŭ, kažuć, što pa hetaj pryčynie rola bieśpiłotnikaŭ abmiežavanaja, skazaŭ jon.
Zamiest hetaha ŭkrainskija vojski prosiać sučasnyja źniščalniki ŭ zachodnich sajuźnikaŭ.
U toj čas jak ukrainskija bieśpiłotniki stanoviacca ŭsio mienš efiektyŭnymi, Rasija vykarystoŭvaje stolki ž, kali nie bolš, ułasnych bieśpiłotnikaŭ, asabliva ŭ vyviednickich metach, nazirańni i rekahnascyroŭcy, kaža ekśpiert Biendet.
Va ŭkraincaŭ niama zbroi, kab źbić ich.
— My nie možam bačyć rasijskija bieśpiłotniki, ale jany mohuć bačyć nas. Usio, što my možam zrabić — heta schavacca, — kazaŭ adzin z abaroncaŭ Ukrainy haziecie «The Sunday Times».
«Jany sprabujuć zavabić ukraincaŭ u pastku»
Biendet miarkuje, što ciaham nastupnych niekalkich tydniaŭ rasijskija vajskoŭcy pasprabujuć lepš arhanizavać i praciahnuć svoj nastup:
«Jany sprabujuć zavabić ukraincaŭ u pastku vakoł niekatorych haradoŭ i pasiołkaŭ, sprabujuć cisnuć i asłabić ŭkrainskuju abaronu. Bieśpiłotniki hrajuć klučavuju rolu ŭ zabieśpiačeńni ruskich infarmacyjaj, nazirańniem i vyviedkaj, kab jany mahli nanosić ŭdary ź ziamli i z pavietra.
— Tamu my ŭbačym, jak rola bieśpiłotnikaŭ z rasijskaha boku budzie raści, kali vajna praciahniecca ŭ ciapierašnim vyhladzie, — ličyć jon.