«Hałoŭnaje, kab paśla hetaha nie pačali źmianšać premii». Miedyki pra abiacańni pavysić nadbaŭki i pra realnyja zarobki
Z 1 lipienia miedykaŭ čakaje pavyšeńnie zarobkaŭ. Nadbaŭka musić skłaści ad 35% da 200% akładu. Pahavaryli ź lekarami pra toje, jak jany staviacca da hetych navin, što było apošnim časam z kavidnymi dapłatami, i padličyli, nakolki ŭ realnych ličbach moža vyraści ich zarobak.
24.06.2022 / 08:37
Zhodna z pastanovaj Minzdaroŭja, nadbaŭka ŭ lekaraŭ składzie minimum 85% akładu, a ŭ siaredniaha piersanału — minimum 35%.
Kardyjołah adnoj z haradskich paliklinik Bresta, jaki pracuje na adnu staŭku, atrymlivaje na ruki krychu bolš za 900 rubloŭ. Ź ich kala 300 rubloŭ — toj samy akład, jaki i musić vyraści za košt nadbaŭki. Pavołdie novaj pastanovy, užo praź miesiac doktar musić atrymać kala 1150 rubloŭ zamiest ciapierašnich 900 z kapiejkami.
«U teoryi, zarpłata musić vyraści pryblizna na 250 rubloŭ, heta, biezumoŭna, pryjemna, ale heta ŭsio adno navat nie zapavietnyja 500 dalaraŭ, pra jakija tak doŭha kažuć u našaj krainie. Ale pakul my nie atrymali zarpłatu pa novych staŭkach, kazać dakładna, što pryrost budzie mienavita takim, nielha», — adznačaje surazmoŭca.
Kardyjołah aścierahajecca, što paśla ŭviadzieńnia značnaj nadbaŭki, lekaram prosta pačnuć naličvać mienš premij.
«Hledziačy na toje, što adbyvajecca ŭnutry sistemy achovy zdaroŭja, u mianie ŭźnikajuć sumnievy nakont taho, što dziaržava znojdzie stolki hrošaj, kab usim miedykam rezka i davoli istotna pavysić zarobki. U lubym vypadku, kiraŭnictva pakul nijak nie kamientavała, jakija zarpłaty čakajuć nas u nastupnym miesiacy».
Inšy naš surazmoŭca — małady chirurh ź Minska. Pracujučy na staŭku, jon atrymlivaje kala tysiačy rubloŭ.
«Z majoj tysiačy sam akład składaje kala 360 rubloŭ. Atrymlivajecca, što zarobak moža vyraści adrazu na trysta rubloŭ i narešcie dojdzie da zapavietnych 500 dalaraŭ».
Akład miedsiastry, jakaja pracuje ŭ fizijaterapieŭtyčnym adździaleńni ŭ adnoj z hrodzienskich paliklinik, składaje 240 rubloŭ.
«Praz dapłaty za škodnaść i akazańnie płatnych pasłuh zarpłata ŭ nas pa miedsiastrynskich mierkach adnosna vysokaja — kala 800 rubloŭ. Pra toje, što zarpłaty musiać vyraści, my ŭžo viedajem, ale jakaja budzie finalnaja ličba, nam pakul nie ahučvali», — kaža žančyna.
Kali dadać da 240 rubloŭ abiacanyja 35%, to atrymajecca, što zarpłata ŭ miedsiastry pavialičycca pryblizna na 85 rubloŭ.
Doktar ahulnaj praktyki (raniej učastkovy terapieŭt) sa stažam, pracujučy na poŭnuju staŭku, atrymlivaje blizu 1000 rubloŭ u miesiac. Staŭka ŭ jaho składaje kala 350 rubloŭ, astatniaje — premii i roznyja nadbaŭki.
Zhodna z pastanovaj Minzdaroŭja, daktary ahulnaj praktyki ŭ paliklinikach mohuć raźličvać na plus 470 rubloŭ da zarpłaty. A ich miedsiostry buduć zarablać na 120-130 rubloŭ bolej.
«Zychodziačy z dośviedu, ja sumniavajusia, što ŭ nastupnym miesiacy atrymaju 1400 rubloŭ zamiest tysiačy. Bo kali pavyšajuć niešta adno, to zvyčajna źmianšajuć inšaje.
Miarkuju, što budzie, jak z kavidnymi vypłatami. Byŭ pieryjad, kali ŭčastkovyja sapraŭdy hodna zarablali, ale heta było da apošniaj chvali kavidu, kali zarpłata była kala 1000 dalaraŭ. Ale ŭžo tady było zaŭvažna, što praz patrebu vypłačvać kavidnyja nam urazali premii. Bo kali b premii pakidali na byłym uzroŭni, to razam z kavidnymi vychodziła b jašče bolš», — dzielicca doktar.
Z časam vypłaty za kavid pačali skaračacca.
«Načalstva pa ŭkazcy źvierchu pačało źmianiać schiemy naličeńniaŭ i h. d. U sakaviku ŭvohule kazali nie rabić testy, za vyklučeńniem ciažarnych, zastrachavanych pacyjentaŭ, a taksama tych, chto idzie na kanflikt, bo heta doraha, a hrošaj u ministerstva sioleta mała. Tamu mnie zdajecca, što pavyšeńnie budzie značna mienšym, čym moža zdavacca», — padsumoŭvaje surazmoŭca.
Doktarka ahulnaj praktyki adnoj ź minskich paliklinik zhadvaje, što na pačatku epidemii karanavirusa dapłata ŭ jaje składała 1000 rubloŭ. Apošnim časam, pakolki źmianiłasia sistema naličeńnia (dapłata davałasia tolki za dni, kali doktar pracavaŭ z paćvierdžanymi kavidnymi chvorymi) i chvala pajšła na spad, sumy byli minimalnyja.
«Za minuły miesiac dapłata ŭ mianie była kala 40 rubloŭ», — dzielicca miedyk.
Ahułam, pa słovach daktaroŭ, akład redka pieravyšaje pakazčyk u 400 rubloŭ. Tamu atrymlivajecca, što najbolšy pryrost u zarobkach, jaki moža być (+200% da akładu), składzie kala 800 rubloŭ. Na takija pavyšeńni mohuć raźličvać daktary, jakija pracujuć u adździaleńniach aniestezijałohii i reanimacyi.