Niekalki kałonij raboha suślika ŭ Biełarusi pieradadzienyja pad achovu
Pad achovu ŭziatyja dźvie nievialikija kałonii raboha suślika kala viosak Cahielnia i Siejłavičy Niaśvižskaha rajona. Akramia hetaha, buduć ciapier pad achovaj jašče 15,1 ha asnoŭnaj kałonii kala vioski Jušavičy, jakija taksama raniej nie byli abaronienyja. Zaraz u Jušavičach budzie achoŭvacca 96,8 ha, pieradaje telehram-kanał «Dzikaja pryroda pobač».
03.06.2022 / 20:20
«Na siońniašni dzień, takim čynam, jość šeść pieradadzienych pad achovu kałonij rabych suślikaŭ, jakija znachodziacca ŭ Niaśvižskim i Kapylskim rajonach, płoščaj 138,94 ha, — paviedamiŭ ekśpiert Juryj Jankievič, udzielnik ekśpiedycyj pa pošuku raboha suślika. —
Pa vynikach našych ulikaŭ, praviedzienych va ŭsich viadomych žyłych kałonijach, kolkaść suślikaŭ u Biełarusi składaje kala 5000 źviarkoŭ».
Uličvajučy, što pałova kałonij znachodzicca ŭ depresiŭnym stanie, nieabchodna raspracoŭka dadatkovych zachadaŭ pa ich umacavańni. Pieradača ŭsich kałonij pad achovu daje nadzieju, što papulacyja raboha suślika ŭ Biełarusi budzie ŭratavanaja.