«Mikoła dobra vyhladaje»: Žonka Statkieviča pabačyła muža ŭpieršyniu za dva miesiacy
Palitviazień dziakuje ŭsim, chto praciahvaje padtrymlivać niespraviadliva źniavolenych, piša Radyjo Svaboda.
02.06.2022 / 18:08
1 červienia Viarchoŭny sud admoviŭ Mikołu Statkieviču, asudžanamu na 14 hadoŭ źniavoleńnia, i inšym fihurantam «spravy Cichanoŭskaha» ŭ pierahladzie prysudu. Pavodle praviłaŭ, na praciahu 10 dzion palityka pavinny pieravieści ŭ miesca adbyvańnia pakarańnia. U vypadku Statkieviča heta Hłybockaja kałonija, dzie źniavolenym zabiaśpiečvajuć asablivy režym utrymańnia.
Žonka Mikoły Statkieviča Maryna Adamovič adrazu paśla razhladu apielacyi źjeździła ŭ Homiel i zmahła pabačyć muža ŭpieršyniu za dva miesiacy.
«Heta było spatkańnie, jakoje ty možaš atrymać, a možaš i nie atrymać, — raskazała Maryna Adamovič. — Jany dajuć dazvoł paśla razhladu apielacyi, ale jon dziejny tolki da taho momantu, pakul nie pryjšli dakumienty z suda ŭ SIZA. Nam pašancavała, ja paśpieła pabačyć Mikołu. Dźvie hadziny, u tym ža samym pakoi i na tym ža samym miescy, jakoje ŭ Mikałaja ŭžo piersanalnaje. U mianie cudoŭny nastroj, bo Mikoła dobra vyhladaje, niahledziačy na dva hady źniavoleńnia, niahledziačy na ŭmovy, niahledziačy na trojčy pieraniesieny karanavirus. Jon ciapier adnaviŭsia. Adčuvańnie, što ja ź im nie raźvitvałasia ni na chvilinu».
Papiaredniaje spatkańnie Mikoły Statkieviča z žonkaj adbyłosia jašče da pieradačy jaho spravy na apielacyjny razhlad, na pačatku krasavika. Maryna Adamovič kaža, što pry vyniki apielacyi jany z mužam navat nie zhadvali. Dla ich heta było adzinym šancam atrymać prava na spatkańnie, tamu hetaja padzieja ŭsprymałasia tolki praz takuju mahčymaść.
«Heta byŭ dla nas taki čakany siurpryz, — kaža Maryna. — Mikoła vielmi prasiŭ padziakavać usim biełarusam, jakija praciahvajuć padtrymlivać palitviaźniaŭ. Nie tolki jaho, ale kožnaha. Mikoła kaža, što nielha dzialić palitviaźniaŭ na katehoryi ŭ zaležnaści ad taho, što stała pryčynaj źniavoleńnia. Padtrymka palitviaźniaŭ u taki žorstki čas patrabuje mužnaści, jaho ŭdziačnaść biełarusam biaźmiežnaja. Mikoła kaža, što ŭsie biez vyklučeńnia ludzi, jakija paciarpieli za svaju hramadzianskuju pazicyju, pavinny mieć padtrymku».
Ad pačatku vajny va Ukrainie Mikoła Statkievič amal nie atrymlivaje paviedamleńniaŭ z voli. Vyklučeńnie — hrašovyja pieravody i banderoli, jakija jamu dasyłajuć ludzi. Pierapiska amal całkam spyniłasia.
«Šmat i pra Ukrainu havaryli, pra padziei ŭ śviecie, — raskazvaje Maryna Adamovič. — Ja vielmi ŭražanaja tym, što Mikoła pieraličyŭ mnie ŭsie vypadki terytaryjalnych sprečak za apošnija 70 hadoŭ, usie vypadki ahresii, jakija adbylisia za hety čas. Mikoła miarkuje, što vajna zaciahniecca. Ale bližej da vosieni front stabilizujecca. Kaža, što na hetym etapie Pucin moža zadavolicca viartańniem «ŁNR» i «DNR» u miežy abłaściej, ale ŭkraincy ŭžo na heta nie pahodziacca. Taksama Mikoła aścierahajecca, što kanflikt moža pieraraści ŭ paŭnavartasnuju suśvietnuju vajnu».
Pa słovach Maryny Adamovič, Mikoła Statkievič praktyčna ŭvieś čas znachodzicca ŭ adzinočnaj kamiery i źbirajecca adbyvać źniavoleńnie hetkim čynam i nadalej. Palityk nie choča davać mahčymaść administracyi vybirać jamu sukamiernikaŭ i takim čynam niejak upłyvać na jaho.