Vyniesienyja surovyja prysudy ŭdzielnikam «viciebskich pierformansaŭ»
U sudzie Viciebskaha rajona 20 maja vyniesienyja prysudy palitviaźniam Irynie Piarcovaj, Arciomu Łatyšavu, Kaciarynie Makarevič i Juli Łabunovaj, viadomym jak ŭdzielniki «viciebskich pierformansaŭ», paviedamlaje «Viasna».
20.05.2022 / 16:09
U vinu im stavili nastupnyja akcyi: raźbili biejsbolnaj bitaj kinieskop televizara z naleplenaj fatahrafijaj biełaruskaha praŭładnaha žurnalista, spalili drukavanyja vydańni dziaržSMI, na čužoj mahile pastavili partret Łukašenki.
Sudździa Michaił Zubienia prysudziŭ abvinavačanym nastupnyja terminy:
• Irynie Piarcovaj — 2,5 hoda kałonii ahulnaha režymu;
• Juli Łabunovaj, Kaciarynie Makarevič — 4,5 hoda kałonii ahulnaha režymu;
• Arciomu Łatyšavu — 6 hadoŭ kałonii ahulnaha režymu.
Apošnija słovy abvinavačanych — trahiedyja złamanych losaŭ
U svaim apošnim słovie Iryna Piarcova prasiła nie pazbaŭlać jaje voli.
«Ja znachožusia ŭ SIZA vosiem miesiacaŭ, byŭ čas kab usio ŭśviadomić. Ja adna vychoŭvaju syna, ciapier jaho addaduć u dziciačy dom, jon budzie raści biez maci».
Jula Łabunova vielmi emacyjna kazała ab tym, što ŭ jaje doma zastałasia dačka. U jaje samy składany ŭzrost, joj patrebnaja maci, kłopat i ŭvaha: «Mnie soramna za svoj učynak, za toje što prynošu hora i pakuty svajoj siamji. U mianie byŭ čas zrabić vyvady i pryznać svaje pamyłki. Ja čystasardečna raskajvajusia. Prašu nie pazbaŭlać mianie voli i dać mahčymaść viarnucca da svajoj siamji i pracy, jakoj ja vielmi daražu».
Arciom Łatyšaŭ: «Usio žyćcio ja staraŭsia być sumlennym i spraviadlivym. Ja vykonvaŭ usie ŭskładzienyja na mianie siamjoj i dziaržavaj abaviazalnictvy, adpracavaŭ pa nakiravańni paśla vučoby, słužyŭ u vojsku, vałancioryŭ padčas epidemii kavidu. Ja zaŭsiody chacieŭ być karysnym svaim blizkim i hramadstvu, usio rabiŭ dziela hetaha. Prašu pryznačyć pakarańnie, nie źviazanaje z pazbaŭleńniem voli.
Prašu taksama nie pazbaŭlać voli dziaŭčat, jakija znachodziacca sa mnoj za kratami i pryznačyć im minimalnaje pakarańnie, jakoje tolki mahčyma. Jany ŭžo šmat naciarpielisia ŭ SIZA ŭ vielmi ciažkich umovach, jakija nie kožny mužčyna moža vytrymać. Tut šmat kazali pra charaktarystyki ź SIZA, ale nie kazali pra incydent, jaki zdaryŭsia ŭ listapadzie 2020 hoda. Unačy moj susied pa kamiery pierarezaŭ sabie ŭsie vieny na ruce. Ja pieršy pračnuŭsia i razam ź inšymi, zabili tryvohu. Kali b my spaźnilisia — hety čałaviek zahinuŭ by».
Kaciaryna Makarevič taksama raskajvałasia…
«Chaču kab naša hramadstva žyło ŭ miry i zhodzie. Chaču zajmacca lubimaj pracaj, Ja nie zdymaju ź siabie adkaznaści. Maje blizkija taksama ciarpiać i pieražyvajuć za mianie. Dajcie šaniec kłapacicca pra maci. Joj treba apłačvać maje kredyty. Mnie soramna pierad svaimi blizkimi. Kožny čałaviek moža zrabić pamyłku, ale jon jaje moža vypravić».