Расія і Беларусь будуць пазбаўленыя права трансляваць Алімпійскія гульні — 2026 і 2028 гадоў. БТ ужо гатовае да пірацтва
Зімовыя Алімпійскія Гульні 2026 года, якія маюць прайсці ў італьянскіх Мілане і Карціна-д'Ампеца, і Летнія Алімпійскія гульні 2028 года, якія пройдуць у амерыканскім Лос-Анджэлесе, у Расіі і Беларусі не пакажуць.
16.05.2022 / 18:04
Абедзве краіны не дапусцілі да тэндара на набыццё правоў для трансляцыі Алімпійскіх гульняў, што вынікае з заявы, апублікаванай на сайце Міжнароднага алімпійскага камітэта. Заяўкі на тэндар прымаліся да 24 красавіка.
Да гэтых спартыўных форумаў яшчэ вельмі далёка, але Беларускае тэлебачанне ўжо настроенае груба парушаць міжнародныя правілы. Гэта можна зразумець з перапосту ў афіцыйным тэлеграм-канале АТН хамскага допісу праўладнага канала «Жёлтые сливы»:
«Проста тыя тэлетрансляцыі, за якія раней даводзілася плаціць сотні тысяч і мільёны еўрадаляраў, цяпер будуць забіраць бясплатна і трансляваць на РБ. А што яны зробяць таму ж БТ? Выключаць з ЕВС? Дык ужо выключылі…»