Narviežski futbolny vunderkind jedzie razryvać Anhliju. Chto taki Erlinh Chołan?
Aŭtar dzieviaci hałoŭ u adnym matčy, suśvietny rekardsmien u skačkach u daŭžyniu, repier i aŭtar sotni miemaŭ. Usio heta — navabraniec «Mančester Sici», jaki za 75 miljonaŭ jeŭra pierabirajecca ŭ Anhliju z dortmundskaj «Barusii». «Naša Niva» raskazvaje šerah cikavych, śmiešnych i navat šakujučych historyj pra navabranca «haradžan» Erlinha Chołana.
10.05.2022 / 22:01
U «Man Sici» Chołan budzie zarablać 350 tysiač funtaŭ na tydzień plus bonusy. Fota: footballtransfers.com
Sapraŭdnaja mašyna dla hałoŭ
Erlinh na prafiesijnym uzroŭni vystupaje šosty siezon — sam pa sabie fienamienalny pakazčyk dla chłapčyny 2000 hoda naradžeńnia. Za hety čas jon źmianiŭ čatyry kłuby, vyjšaŭ na pole ŭ 137 sustrečach dy adznačyŭsia 92 trapnymi strełami.
Pa sutnaści praduktyŭnaść chłopca blizkaja da niejkaha kampjutarnaha čytara ŭ futbolnym simulatary. Bo z takoj chutkaściu, rehularnaściu dy efiektnaściu navat najlepšyja forvardy ŭ historyi ŭ top-čempijanatach nie vyznačalisia — na svoj uzrost, zrazumieła.
Chołand ža z 2020-ha ŭ składzie dortmundskaj «Barusii» vypalvaje ŭsio navokał nie tolki ŭ niamieckaj Bundeślizie, ale i ŭ Lizie čempijonaŭ.
Zabiŭ za zbornuju dzieviać hałoŭ u adnym matčy
Razmova idzie pra moładzievuju kamandu Narviehii. Na pieršynstvie płaniety U-20 skandynavy razhramili kamandu Handurasa 12:0, a Erlinh staŭ aŭtaram ažno dzieviaci miačoŭ. I tym samym pastaviŭ absalutny rekord spabornictva. Cikava, što pry hetym Chołand byŭ na dva hady maładziejšy za tavaryšaŭ pa kalektyvie i supiernikaŭ z Centralnaj Amieryki.
Vaładar suśvietnaha rekordu ŭ lohkaj atletycy
Adrazu abmovimsia: havorka idzie pra piacihadovych chłapčukoŭ dy maładziejšych za ich. Adnak usio astatniaje — čystaja praŭda. Erlinh u dziacinstvie zajmaŭsia roznymi vidami sportu: łyžami, handbołam (jaho navat klikali ŭ zbornuju), valejbołam. Nie abminuŭ i lohkuju atletyku. I voś tut jahony zorny čas nadyšoŭ zadoŭha da taho, jak hały na stadyjonach prynieśli suśvietnuju viadomaść.
U 2006 hodzie na rehijanalnych spabornictvach pa skačkach u daŭžyniu Chołan pralacieŭ 163 sm — i dziakujučy hetamu ŭstalavaŭ suśvietny rekord u katehoryi U-5. Darečy, dasiahnieńnie aktualnaje i zaraz. Adnak pra jaho Erlinh užo i nie ŭzhadvaje.
Ledź nie pabiŭ rekord u spryncie padčas matča Lihi čempijonaŭ
Chutkaść Chołana — sintez pracy nad saboj i ŭdałaj kambinacyi hienaŭ. Baćka futbalista ŭ minułym prafiesijna zajmaŭsia futbołam i navat damohsia kantrakta ŭ anhlijskaj Premjer-lizie. Maci zavajoŭvała zołata na nacyjanalnym pieršynstvie ŭ siamiborji. Tamu bijałahična Erlinh byŭ bolš čym schilny dla sportu. Nadalej ža, ruchajučysia pa karjernaj leśvicy, jon tolki ŭdaskanalvaŭ navyki dy raskryvaŭ patencyjał.
Sapraŭdnuju ž nieabsiažnaść mahčymaściaŭ forvarda publika zrazumieła ŭ lutym 2020 hoda, kali padčas sustrečy suprać francuzskaha PSŽ Chołan prabieh 60 mietraŭ pola za 6,64 siekundy. Hety vynik, naprykład, dazvoliŭ by jamu trapić u finalnuju častku pieršynstva śvietu pa lohkaj atletycy — 2018!
Bolš za toje, suśvietny rekord na dadzienaj dystancyi siarod prafiesijnych lohkaatletaŭ składaŭ 6,34. I kab jaho pastavić, spryntery nieślisia pa roŭnaj darožcy bieź miača ŭ nahach!
I chaj sabie rekordu Erlinh nie pabiŭ, ale dapamoh źjavicca sotniam śmiešnych miemaŭ, jakija taksama nazaŭsiody ŭvajšli ŭ historyju.
Atrymaje u byłym kłubie baćki 350 tysiač funtaŭ na tydzień
Pra Chołana-starejšaha jak futbalista my ŭžo ŭzhadvali. Adnak nie nazyvali kłub APŁ, jaki pavieryŭ u narviežca. Heta byŭ toj samy «Mančester Sici», jaki ciapier vykłaŭ 75 młn jeŭra adnym tranšam. U minułym stahodździ «haradžanie» pra status supierkłuba mahli tolki maryć. A tamu baćku Erlinha i hrošy ścipłyja ŭ jakaści zarpłaty prapanavali, i asabliva na trafiei pry im nie zamachvalisia.
Ciapier ža pad patranatam arabskich šejchaŭ «Sici» źjaŭlajecca ledź nie samym zamožnym kłubam śvietu dy hatovy vydatkavać vunderkindu 350 tysiač funtaŭ na tydzień plus bonusy. Heta aŭtamatyčna pieratvoryć Erlinha ŭ adnaho z nabolš zamožnych forvardaŭ śvietu.
Čytaje rep i lubić kiebab
Chołan vielmi surjozna stavicca da charčavańnia dy snu, kab padtrymlivać svajo cieła ŭ idealnym stanie. Navat kapiruje dyjetu Kryšcijanu Ranałdu, kab być takim ža, jak lehiendarny partuhalec. Adnak, jak i kožny čałaviek, narviežac maje słabaści. U pryvatnaści, najlepšaj stravaj na ziamli Erlinh nazyvaje kiebab, a ŭlubionym napojem — pina-kaładu.
Da taho ž skandynaŭ peŭny čas dumaŭ pra praryŭ u rep-muzycy, dla čaho zasnavaŭ hurt Flow Kingz. Razam ź siabrami Chołan «žachnuŭ» trek Kygo Jo, adnak u bijahrafii bandy jon zastaŭsia adzinym. Praŭda, kazać «na žal» u hetym vypadku dakładna nie prychodzicca:
pra što idzie «fłoŭ» ŭ pieśni i ŭvohule, jakoj movaj jana vykonvajecca, nie razumiejuć navat narviežcy z dośviedam.
Praktykuje budysckija miedytacyi
Hledziačy na toje, jak źmianiajecca jahony tranśfierny košt (u 2019-m jon z 5 młn pieratvaryŭsia ŭ 50!), Erlinh moh by zhubić hałavu. Adnak chłopcu, pierš za ŭsio, heta nie dazvoliła zrabić baćkoŭskaje vychavańnie. Chołana vyhadavali ścipłym dy ščodrym: naprykład, paśla adnoj ź viačeraŭ padčas vakacyj dla siamji i siabroŭ, što paciahnuła na 500 tysiač jeŭra, narviežac pakinuŭ haściniec u pamiery 30 tysiač.
Akramia taho, forvard davoli vialikuju ŭvahu nadaje psichałahičnaj raŭnavazie. I kab jaje zachoŭvać, praktykuje aktyŭnyja miedytacyi pa budysckich tradycych. Mienavita tamu vialikuju kolkaść hałoŭ futbalist śviatkuje ŭ pozie Łotasa, kab padkreślić karysnaść praktykavańniaŭ.