Miadźviedzieŭ: Tudy joj i daroha, takoj Ukrainie! Navukaj budzie nie tolki ciapierašniaja śpiecapieracyja
Eks-prezident Rasii, namieśnik staršyni Rady biaśpieki Dźmitryj Miadźviedzieŭ apublikavaŭ artykuł «Ab fejkach i sapraŭdnaj historyi», u jakim dzielicca svaim bačańniem situacyi va Ukrainie. Artykuł pieravažna paŭtaraje tezisy artykuła «Što Rasija pavinna zrabić z Ukrainaj»: Ukraina nie maje prava na isnavańnie, historyja, zdabytki, kultura, podźvihi ukraincaŭ — fejk, Rasija nie spynicca, pakul nie źniščyć Ukrainu i jaje lidaraŭ.
05.04.2022 / 11:05
Dźmitryj Miadźviedzieŭ. Fota: AP
«Pryvid Kijeva», fota samalota, jakoje ŭziataje z kampjutarnaj hulni. Źbity słoikam ahurkoŭ bieśpiłotnik. «Zahinułyja hieroi», jakija zdalisia ruskamu vajskovamu karablu, maryupalski raddom, ciapier — Buča. Što ich abjadnoŭvaje?»
Dźmitryj Miadźviedzieŭ zapeŭnivaje, što «ŭsio heta fejki, jakija vyśpieli ŭ cyničnym ujaŭleńni ŭkrainskaj prapahandy», što «fabryki trolaŭ», jakija kuryrujucca zachodnimi ŭradami i ich «ručnymi» NKA i NDA, robiać ich za vializnyja hrošy.
«Kijeŭskaja fejk-mašyna nie spyniajecca ni pierad čym!
Dla rasčałaviečvańnia Rasii i jaje maksimalnaha ačarnieńnia raźjušanaje źviarjo z nacbataŭ i terabarony hatovaje miž inšym zabić ułasnych mirnych žycharoŭ.
Usio tamu, što hłybinnaje ŭkrainstva, jakoje padsiłkoŭvajecca antyrasijskaj atrutaj i usiopahłynalnaj chłuśnioj z nahody svajoj identyčnaści, — heta i jość adzin vialiki fejk. Hetaj źjavy nikoli nie było ŭ historyi. I ciapier nie isnuje».
Miadźviedzieŭ narakaje, što «vysokaja hiermanskaja navuka i kultura — Renthien, Płank, Frejd, Man, Hiese — ničoha nie zmahła supraćpastavić tym, chto prahnuŭ spačatku kryvi i kałonij, a paśla Pieršaj suśvietnaj — revanšu i «žyćciovaj prastory» na ŭschodzie».
«I ŭžo kali vialikim niamieckim rozumam nie ŭdałosia ŭtajmavać vajennuju mašynu, što ŭžo kazać pra siońniašni Kijeŭ — «Ejnštejnaŭ» tam dakładna niama. Praŭda, jość Kličko», — ź nieprychavanaj pahardaj piša były prezident Rasii.
Miadźviedzieŭ znoŭ pierachodzić da tradycyjnaj tezy «Heta nie my fašysty, heta vy fašysty».
«Pasijanarnaja častka ŭkraincaŭ apošnija 30 hadoŭ maliłasia na Treci rejch. Litaralna.
Ahidu vyklikajuć fatahrafii, na jakich praktyčna ŭ kožnaj vajskovaj častcy Ukrainy, uziataj našaj armijaj, znachodziać nacysckuju simvoliku — štandary, litaraturu, płakaty. Navat kubki sa svastykaj! Heta nie hulnia ŭ fašysckuju estetyku, jak nam sprabujuć dakazać zachodniki. Heta ideałohija.
Nie varta ździŭlacca, što pieratvoranuju mientalna ŭ Treci rejch Ukrainu, jakaja zapisała ŭ padručniki pa historyi imiony iud i nacysckich prychvaśniaŭ, jaho ž los i napatkaje.
Tudy joj i daroha, takoj Ukrainie! Jak i asobnym vyradkam, jakija ličać, što majuć prava padobnuju Ukrainu pradstaŭlać. Navukaj im budzie nie tolki ciapierašniaja śpiecapieracyja, ale i epizody słaŭnaha minułaha. Naprykład, kali Pavieł Sudapłataŭ źniščyŭ nacyjanalista Jaŭhiena Kanavalca, vietliva pieradaŭšy hetamu amataru sałodkaha ŭ Raterdamie skrynku z cukierkami z bombaj ŭnutry — «Cie vam podarunok z Kijeva». Takich «padarunkaŭ», — pahražaje Miadźviedzieŭ, —budzie jašče niamała!».
«Prezident Rasii Uładzimir Pucin ćviorda pastaviŭ metu demilitaryzacyi i denacyfikacyi Ukrainy. Hetyja składanyja zadačy nie vykonvajucca za adzin raz. I jany buduć vyrašacca nie tolki na palach bitvaŭ. Źmianić kryvavuju i poŭnuju chłuślivych mifaŭ śviadomaść častki ciapierašnich ukraincaŭ — najvažniejšaja meta. Meta ŭ imia spakoju budučych pakaleńniaŭ samich ukraincaŭ i mahčymaści narešcie pabudavać adkrytuju Jeŭraziju — ad Lisabona da Uładzivastoka», — reziumuje Dźmitryj Miadźviedzieŭ.