«Nie ŭsie ŭ Kijevie zrazumieli». Jak razychodzilisia amierykanskaja i ŭkrainskaja stratehii strymlivańnia Rasii
Nie ŭsie ŭ Kijevie zrazumieli, što amierykancy vydajuć rasijskija płany nie dla taho, kab jany ažyćciaŭlalisia, a jakraz dla praduchileńnia realizacyi hetych płanaŭ, kab nie paŭtaryŭsia 2014 hod.
16.02.2022 / 21:27
Na hety dysanans ciažka nie źviarnuć uvahu. Pakul zachodnija palityki, miedyja, raźviedki ŭ ałarmisckim tonie papiaredžvajuć śviet pra mahčymaje rasijskaje nastupleńnie na Ukrainu, malujuć apakaliptyčnuju karcinu nastupstvaŭ vajny, nazyvajuć navat kankretnyja mahčymyja daty ŭvarvańnia, u samoj Ukrainie prezident Zialenski prosić nie panikavać.
19 studzienia Zialenski paprasiŭ krytyčna aceńvać infarmacyju pra mahčymaje ŭvarvańnie Rasii va Ukrainu. Na jaho dumku, Rasija naŭmysna sieje paniku i niaŭpeŭnienaść u nasielnictvie, kab asłabić mahčymy supraciŭ i adpudzić biznes-inviestaraŭ. Zialenski paprasiŭ źbierahać hodnaść i honar, kab nie padyhryvać ahresiŭnym namieram Rasii.
«Budziem budavać darohi, masty, škoły, stadyjony, vahony, samaloty i tanki. Vakcynujem pieravažnuju bolšaść nasielnictva. U krasaviku — adznačym Vialikdzień. U mai, jak zvyčajna, — sonca, vychadnyja, šašłyki, i viadoma — Dzień Pieramohi. A dalej leta», — abiacaje Zialenski ŭkraincam.
Taksama ŭkrainskija ŭłady krytykujuć Zachad za nahniatańnie situacyi. Na dumku Zialenskaha, heta nanosić Ukrainie nie mienšy ekanamičny ŭron, čym vajennyja dziejańni.
Zialenski krytykuje mižnarodnych partnioraŭ za papiaredžańni adnosna rasijskaj pahrozy.
«Nas nie treba papiaredžvać — nam treba dapamahać», — kaža ŭkrainski prezident.
Ukrainskija palityki i žurnalisty krytykujuć Zachad za toje, što raskryćcio infarmacyi pra mahčymaje rasijskaje ŭvarvańnie padarvała rynak avijacyjnych pieravozak.
Ukraincy raniej šmat narakali na Zachad, abvinavačvali jaho ŭ niedastatkovaj dapamozie, abražalisia na handal z Rasijaj, patrabavali bolšaj salidarnaści.
I voś u 2022 hodzie, kali ŭkraincy hetuju salidarnaść atrymali, kali dziasiatki amierykanskich avijarejsaŭ adpravili va Ukrainu sotni ton abaronnaj zbroi, kali Vašynhton zrabiŭ niemahčymaj niečakanuju ataku i naviazaŭ Maskvie svaju hulniu, kali ZŠA pačali hienieravać napružany infarmacyjny fon pra surjoznaść rasijskaj pahrozy, kali Rasija ŭ vačach śvietu stała prosta ŭvasableńniem zła, ukraincy pačali abvinavačvać zachodnich partnioraŭ u štučnym nahniatańni i stvareńni paniki.
Amierykanskaja zbroja prylacieła ŭ Kijeŭ.
Zdajecca, nie ŭsie ŭ Kijevie zrazumieli, što amierykancy vydajuć rasijskija płany nie dla taho, kab jany ažyćciaŭlalisia, ci kab napužać inviestaraŭ, a jakraz dla praduchileńnia realizacyi hetych płanaŭ, kab nie paŭtaryŭsia 2014 hod.
Intensiŭnaść infarmacyjnych paviedamleńniaŭ Biełaha doma vakoł pahrozy rasijskaha ŭvarvańnia — heta nie stolki indykatar surjoznaści situacyi, kolki častka metanakiravanych zachadaŭ dla praduchileńnia takoj ataki. «Nahniatańnie» i jość faktar strymlivańnia ahresara.
Na dumku mnohich ukrainskich palitykaŭ, padobnaja niestandartnaja praaktyŭnaja asimietryčnaja stratehija amierykancaŭ tolki na ruku Pucinu pa ŭvasableńni paniki.
Havorycca pra toje, što ciapierašniaja stratehija Zachadu nibyta pužaje zamiežnych inviestaraŭ. Nie vybaračnaje pravasudździe, nie ŭdzieł pravaachoŭnych orhanaŭ u «admyvańni» deputataŭ-parušalnikaŭ, nie pieratrusy i aryšty majomaści pradpryjemstvaŭ palityčnych praciŭnikaŭ, nie roźnica cen na enierhanośbity dla aliharchaŭ i inšych biznesaŭ, a hatoŭnaść Zachadu padtrymlivać Ukrainu i jaho vyrazny pasył Pucinu.
Nie zrazumieli ŭkraincy i evakuacyi dypłamataŭ z Kijeva ŭ Lvoŭ. Zialenski nazvaŭ pierajezd pasolstvaŭ u Zachodniuju Ukrainu «vialikaj pamyłkaj».
«Niama Zachodniaj Ukrainy, jość Ukraina, jana sucelnaja. Tamu, kali, nie daj Boh, niešta adbudziecca, [heta] budzie ŭsiudy. Nielha być ad eskałacyi abo prablem za 5—6 hadzin… My ŭsie adna kraina. Nie dumaju, što ludzi buduć heta narmalna ŭsprymać. Vyhladaje vielmi dziŭna, ale heta ich vybar», — skazaŭ ukrainski prezident.
Pasolstva ZŠA ŭ Kijevie.
Były pasoł Ukrainy ŭ ZŠA Valer Čały ŭvohule ŭ źjedlivaj maniery napisaŭ pra zachodnija krainy, jakija evakujavali dypłamataŭ dadomu ci ŭ Lvoŭ:
«Kali zakuplajecie pradukty na nastupny tydzień, abo, navat, na ŭsialaki vypadak kamplektujecie tryvožny čamadan abo zaplečnik (…) Addavajcie pieravahu vytvorcam tych krain, jakija dapamahajuć Ukrainie ŭ hety važny momant zbrojaj, nie biahuć poŭnym składam z Kijeva i tych, čyje avijakampanii nie spyniajuć avijarejsaŭ va Ukrainu», — piša jon.
Badaj, najhoršaje, što zaraz adbyvajecca va Ukrainie na fonie pahrozy rasijskaj ahresii — antyzachodniaja rytoryka, jakaja raptam stała papularnaj.
Zialenski amal u kožnaj svajoj pramovie padkreślivaje, što Zachad štučna nahniataje temu uvarvańnia i napadaje na Ukrainu infarmacyjna.
Zialenski i Bajden.
Časam takoje adčuvańnie, što ciapierašnija ŭkrainskija ŭłady krytykujuć Zachad bolš, čym Rasiju. Fienamienalna, nakolki rytoryka ŭkrainskich uładaŭ ciapier časta ŭ hetym pytańni pierasiakajecca z rasijskaj prapahandaj.
Mnohija ŭkraincy pačynajuć dumać, što i Zachad i Rasija adnolkava drennyja, jany platuć intryhi suprać Ukrainy, chočuć jaje asłabić. Usio čaściej možna pačuć ad ukrainskich lidaraŭ hramadskaj dumki naratyvy pra nieabchodnaść nie paddavacca cisku z Uschodu i Zachadu, abapiracca na ŭłasnyja siły.
Na fonie historyi z mahčymym rasijskim uvarvańniem, roźnicy ŭ reakcyi ŭkrainskich uładaŭ i Zachadu, možna pabačyć, nakolki ciapierašniaja Ukraina schilajecca ŭ bok jeŭraskieptycyzmu i izalacyjanizmu. I kali hetaja tendencyja praciahniecca, Ukrainu moža ŭ budučyni čakać adkat u pytańniach jeŭraatłantyčnaj intehracyi.