Hazieta Alaksandra Łukašenki nazvała Ukrainu «jeŭrapiejskim Samaliłendam». Ale heta nie adzinaje aznačeńnie
Prapahandysty vydańnia «SB. Biełaruś siehodnia» pajšli ŭ infarmacyjnuju ataku na Ukrainu. Zbroja ŭ rukach anhłasaksaŭ, bieschrybietnaje miasa ŭ rukach miaśnikoŭ, «jeŭrapiejski Samaliłend». Tak bačać i malujuć Ukrainu ŭ aficyjnaj haziecie Alaksandra Łukašenki.
25.01.2022 / 14:57
Ukraina ŭ raspoviedach «SB. Biełaruś siehodnia» vyhladaje hałotnaj, hałodnaj, pradažnaj i pad vonkavym kiravańniem krainaj. «Ničoha svajho niama». Dy i «ŭkrainskaj dziaržavy jak takoj bolš nie isnuje».
«Ukraina ŭžo raspradała amal usio. Na vačach biadniejuć i tranzitnyja nitki praduktapravodaŭ. Chutka raskupiać ziamlu, užo možna. Ničoha svajho niama, zatoje zbroi — vałam. Plus hramadzianskija kanflikty. Z Ukrainy mietadyčna i metanakiravana robiać jeŭrapiejskaje Samali», — piša vydańnie.
«Samali ‒ heta nie ŭ kryŭdu, heta aznačeńnie», — udakładniaje aŭtar.
«Vakoł razrucha, poŭna zbroi, bandziuki panujuć, «cyvilizavany śviet «padkidvaje droŭcaŭ», — paprakaje aŭtar zachodnija krainy, što tyja dapamahajuć zbrojaj Ukrainie, jakaja pazbaviłasia Kryma i ŭžo vosiem hadoŭ vajuje nie na susiedskaj terytoryi.
Bolš za ŭsio dastajecca «anhłasaksam», jakija «hatovyja vajavać za svoj suśvietny paradak čužymi, jak zaŭsiody, rukami».
«Bityja žyćciom i tamu parazumniełyja niemcy zachoŭvajuć rozum chałodnym. Anhłasaksy ž, jak zaŭsiody, źbirajucca vajavać čužymi rukami. Čužymi žyćciami».
Nie zastałasia biez uvahi i mahčymaść stvareńnia traistaj vosi pamiž Łondanam, Varšavaj i Kijevam.
«Pakiniem pakul u baku, chto ŭ novaj vosi pretenduje na rolu Japonii, chto ‒ Italii, a chto — Hitlera», — byccam nie padazraje aŭtar, što ŭ šmat kaho naŭprost procilehłyja anałohii.
U inšym artykule hetaha ž vydańnia ŭkraincy vystupajuć «bieschrybietnymi susiedziami», jakich «Štaty i Zachad rychtujuć da nieminučaj hibieli».
«Vam kažuć: zabi brata, a vy? Rady?» ‒ u niekalkich słovach aŭtaru ŭdajecca źmiaścić maksimum fantazij.
Vydańnie nie abmiažoŭvaje siabie ŭ mietafarach, epitetach, abrazach.
«Ciapier asabliva prykmietna, što sprabujuć źniščyć uschodniesłavianski pravasłaŭny etnas, kudy ŭvachodziać biełarusy, ruskija i ŭkraincy. Źniščyć praz apošnich, tak praściej.
Ukraina, dakładniej toje, što ad jaje zastałosia, daŭno stała dla ich harmatnym miasam, z dapamohaj jakoha vyrašajuć vyklučna svaje prablemy. Miasa nie supraciŭlajecca, jano pakorlivaje».
«Ukrainskaj dziaržavy jak takoj bolš nie isnuje. U viarchach prosta pierastaŭlajuć adnu maryjanietku zamiest inšaj. Sucelnyja fryki, nakštałt Kličko, i ŭzroŭniem nižejšyja. Dziaržavy niama».
«Adukacyja, kultura, tradycyi, historyja… a ich taksama niama, zastałasia parodyja».
Paśla takoj «bratazabojčaj» vierbalnaj ataki, aŭtar nahadvaje, chto Ukrainie na samaj spravie siabar.
«Chiba brackija narody vas nie papiaredžvali? Nie ŭhavorvali, nie praciahvali ruku dapamohi? A vy jaje — pa łokać dy ŭ dušu plunuli. Ciapier, značyć, u vas Rasija «ahresiŭna pahražaje».
«Vas ža na zaboj rychtujuć tyja, kaho vy ličycie siabrami. Ahulnaviadomy fakt: zachodniaja cyvilizacyja budujecca na tatalnym padmanie, złomie i źniščeńni».
«Hałoŭnaje pytańnie ukruładam: jaki vynik patrebny vam? Vy sapraŭdy ŭsio jašče ličycie, što padčas i paśla vajny Ukrainie i ŭkraincam stanie lepš, nastupić era roskvitu?.. Tak, ZŠA, Brytanija, Aŭstralija i Hiermanija ŭžo abviaścili ab evakuacyi supracoŭnikaŭ ambasad na Ukrainie.
A ty vajuj, ukrainiec, duračok», — reziumuje aŭtar.