Перастаў адкрывацца сайт анлайн-праекта «Карта гвалту»
Праект «Карта гвалту» быў створаны для таго, каб дапамагаць дзяўчатам, якія сутыкнуліся з гвалтам. На сайце можна было падзяліцца ўласнай гісторыяй, ананімна і бясплатна атрымаць кансультацыю ад юрыста або псіхолага.
14.01.2022 / 21:51
Відаць, сайт проста адключаны ўладамі, бо недаступны ён і з-за мяжы. Што, мабыць, звязана з учарашнімі рэпрэсіямі супраць арганізацый «Геном» і «Радзіслава».
13 студзеня стала вядома, што раніцай у Мінску супрацоўнікі ГУБАЗіКа правялі ператрус у 30-гадовай Дар'і Царык, дырэктара «Геному» і члена праўлення арганізацыі «Радзіслава», якая давала прытулак жанчынам, пацярпелым ад хатняга гвалту.
Жанчыну затрымалі, у той жа дзень над ёй адбыўся суд. Дар’ю пакаралі 8 суткамі арышту. Па якім артыкуле, дагэтуль невядома.
Пазней аказалася, што ператрусы прайшлі і ў іншых членаў праўлення «Радзіславы», а таксама іх сваякоў.