«Pytańniaŭ nikoli nie ŭźnikała». U reziervovy fond Łukašenki na nastupny hod pojdzie ŭdvaja bolš hrošaj, čym letaś
U reziervovy fond Łukašenki na nastupny hod adpraviać 1,169 miljarda rubloŭ. Heta ŭdvaja bolš, čym sioleta — 613 miljonaŭ. Miž tym spravazdačnaść pa hetym fondzie nadta dziŭnaja.
30.12.2021 / 19:11
Pa zakonie, pamier fondu, jak praviła, nie moža pieravyšać 1% dachodaŭ respublikanskaha biudžetu. Ale na nastupny hod jon składaje 4% ad płanavanych dachodaŭ.
Dla paraŭnańnia: na miedycynskuju dapamohu nasielnictvu patraciać 759 miljonaŭ rubloŭ, na kulturu — 156 miljonaŭ, na piensii — 1,4 miljarda.
Viadoma, što amal tracina prezidenckaha fondu — hrošy, jakija pierakinuć tudy ź biudžetu Minska. Pamier hetaha tranśfiertu — 418 miljonaŭ rubloŭ.
U prajekcie biudžetu prapisana, na što źbirajucca patracić 900 miljonaŭ z reziervovaha fondu (pa ŭzhadnieńni z Łukašenkam).
Heta vypłata karanavirusnych nadbavak miedykam i sacrabotnikam, dadatkovaje pavyšeńnie zarobkaŭ dziaržsłužačym i biudžetnikam. Hrošy patraciać taksama na zarobki i piensii vajennasłužačym.
Plus na budaŭnictva (ci rekanstrukcyju) abjektaŭ pa rehijanalnych inviestycyjnych prahramach i budaŭnictva i ramont aŭtamabilnych daroh.
Što z astatniaj sumaj, niajasna.
Letaś adličeńni ŭ fond Łukašenki taksama pavialičvali amal u 2,5 raza — z 244 miljonaŭ rubloŭ u 2019-m da 613 miljonaŭ u 2020-m. Uvohule ž, z 2017 pa 2021 hod u hety fond było nakiravana 2,413 miljarda biudžetnych rubloŭ.
Uvohule ž upieršyniu infarmacyja pra reziervovy fond Łukašenki źjaŭlajecca ŭ biudžecie na 1996 hod. Spravazdaču ab tratach fonda zvyčajna publikuje KDK. Ale robić heta dosyć dziŭna: u miežach spravazdačy ab vykanańni biudžetu. Havorka, jak praviła, idzie pra traty tych sum, jakija zaćvierdžanyja ŭ biudžecie. A voś što adbyvajecca ź niepatračanym astatkam, niezrazumieła.
«Na razhlad u parłamient zakonaprajekt ab respublikanskim biudžecie prychodzić ad Minfina praz uchvaleńnie Saŭmina i Administracyi. U prajekcie reziervovy fond prapisany adnym radkom z sumaj. Raźlikam fondu zajmajecca Minfin pa ŭkazańniach ad Administracyi. Na majoj pamiaci pytańniaŭ u sienataraŭ pa hetym fondzie nikoli nie ŭźnikała, typu «vy ž sami ŭsio razumiejecie».
Kali razhladajuć spravazdaču ab vykanańni biudžetu, taja ž karcina — usio adnym radkom biez tłumačeńniaŭ, pytańni taksama nie zadajucca.
Adnojčy było aficyjnaje abhruntavańnie faktyčnych raschodaŭ pa hetych fondzie. Dyk u dakumiencie 90% raschodaŭ byli praviedzieny pa ŭkazach i rasparadžeńniach z hryfam «dla słužbovaha karystańnia», — padzialiŭsia z nami adzin z čynoŭnikaŭ.