Польскія спецслужбы падазраюць, што дэзерцір Чэчка быў беларускім шпіёнам
Ёсць шмат прыкмет таго, што салдат 11-га мазурскага артылерыйскага палка Эміль Чэчка, які дэзерціраваў з польскай арміі, мог быць беларускім шпіёнам або інфарматарам, сцвярджаюць крыніцы польскага выдання Onet. Паводле Onet, гэтая тэма пільна разглядаецца польскімі спецслужбамі.
18.12.2021 / 09:46
Раніцай у пятніцу Беларускі дзяржаўны памежны камітэт паведаміў, што польскі жаўнер папрасіў палітычнага прытулку ў Беларусі з-за нязгоды з палітыкай Польшчы ў дачыненні да міграцыйнага крызісу. Уцекачом аказаўся 25-гадовы Эміль Чэчка.
Па інфармацыі выдання, тыдзень таму радавога Чэчку затрымалі для праверкі супрацоўнікі паліцыі. Тэст паказаў, што ў яго было 1,5 праміле алкаголю. Чэчка не прызнаўся паліцыі, што ён прафесійны вайсковец, таму вайсковую паліцыю на месца не выклікалі. Чэчка ведаў, што інфармацыя ад паліцыі даволі хутка дойдзе да яго вайсковай часткі, а гэта будзе азначаць развітанне са службай.
«Магчыма, гэта паслужыла каталізатарам рашэння аб уцёках у Беларусь», — сказаў выданню былы супрацоўнік вайсковых спецслужбаў.
З некалькіх крыніц, звязаных з вайсковымі спецслужбамі, выданне даведалася, што даволі імаверная здагадка, якая цяпер разглядаецца, — аб тым, што радавы Чэчка некаторы час быў беларускім шпіёнам ці, прынамсі, інфарматарам.
Таксама, па інфармацыі Onet, сястра дэзерціра ў сваяцтве з грамадзянінам Беларусі, і ў яго самога тут ёсць сябры.
Адзін з польскіх афіцэраў у інтэрв'ю Onet сказаў, што аперацыю з польскім жаўнерам маглі падрыхтаваць беларускія спецслужбы.
— Чэчка позна ўвечары перасякае мяжу, яму, вядома, нехта дапамагае, а на наступную раніцу ён ужо дае інтэрвʼю беларускім журналістам. Я не сумняваюся, што гэта было падрыхтавана, — сказаў суразмоўца.
У эфіры дзяржСМІ польскі салдат Эміль Чэчка, што збег у Беларусь 16 снежня, заявіў, што быў сведкам двух выпадкаў забойства польскімі сілавікамі валанцёраў. Таксама ён распавёў, што мігрантаў адмыслова забівалі польскія жаўнеры. «Адзін патруль браў двух жаўнераў, якія штодня забівалі групу асоб, якія змяшчаліся ў кузаве вайсковага грузавіка», — сказаў ён.
Вайсковая паліцыя Польшчы паведаміла, што ў верасні Чэчку судзілі за жорсткае абыходжанне з блізкімі (паводле журналістаў, ён збіў маці), 12 снежня ён быў затрыманы за кіраванне ў нецвярозым стане. Паведамляецца таксама, што ў хлопца праблемы з алкаголем і наркотыкамі.
Трое кіраўнікоў Чэчкі былі звольненыя. Дзеянні былога салдата польскай арміі расцанілі як дэзерцірства, яму пагражае пазбаўленне волі тэрмінам да дзесяці гадоў.