Polskija śpiecsłužby pradstavili svaju viersiju incydentu z samalotam Ryanair
Pres-sakratar ministra — kaardynatara śpiecsłužbaŭ Polščy Stanisłaŭ Žaryn apublikavaŭ u siabie ŭ Fejsbuku videaprezientacyju polskaha rasśledavańnia incydentu z Ryanair. Učora prakuratura padzialiłasia vysnovami rasśledavańnia. Ich taksama ahučvaŭ u efiry polskich ŚMI Stanisłaŭ Žaryn, paviedamlaje reform.by.
10.12.2021 / 15:12
Onliner.by
U pryvatnaści, havorka išła pra toje, što 23 maja ŭ dyśpietčarskaj aeraporta «Minsk» znachodziŭsia supracoŭnik KDB, jaki i pryniaŭ rašeńnie ab pasadcy samalota ŭ Minsku. Paviedamlajecca, što jon pry hetym byŭ na suviazi ź jašče adnym čałaviekam, jakomu dakładvaŭ ab usich dziejańniach. Adznačałasia, što samalotu nie pahražała niebiaśpieka vybuchu, a sam incydent byŭ apieracyjaj biełaruskich śpiecsłužbaŭ, metaj jakoj było zatrymańnie Ramana Pratasieviča.
U videaroliku, apublikavanym Žarynam siońnia, arhumientacyja pašyranaja. U im havorycca, što ŭ hety dzień pracavaŭ dyśpietčar Aleh Halehaŭ. Kala 9:00 univiersalnaha času (12:00 pa Minsku) u zału kantrolu palotaŭ zajšoŭ kiraŭnik «Biełaeranavihacyi» Leanid Čuro i čałaviek, jakoha ŭ Polščy nazvali supracoŭnikam śpiecsłužbaŭ. Paśla hetaha Čuro syšoŭ.
Mužčyna prainfarmavaŭ dyśpietčaraŭ, što na borcie samalota Ryanair znachodzicca bomba, i jon pavinien sieści ŭ Minsku. Polskija śpiecsłužby śćviardžajuć, što byli pryniatyja miery dla taho, kab razmovy z rejsam nie byli čutnyja ŭ inšych samalotach. Pry hetym nibyta absłuhoŭvańniem rejsa zajmaŭsia adzin dyśpietčar pad kantrolem śpiecsłužbista. U roliku havorycca, što mužčyna źviazvaŭsia pa telefonie z čałaviekam, jakoha nazyvaŭ Andrej Anatolevič.
U 9:30 univiersalnaha času samalot uvajšoŭ u pavietranuju prastoru Biełarusi.
U prezientacyi pryvodziacca frahmienty zapisaŭ pieramoŭ dyśpietčara z ekipažam samalota. Asabliva adznačany frahmient pieramovaŭ, u jakim piłot cikavicca uzroŭniem niebiaśpieki. Dyśpietčar prosić jaho zastavacca na suviazi, a zatym źviartajecca na ruskaj movie da niejkaha mužčyny: «Jon kaža: kod paviedamleńnia žoŭty ci čyrvony». Mužčyna adkazvaje jamu, kab skazaŭ, što kod — čyrvony.
Dalej polski bok paviedamlaje, što samalot źmianiŭ kurs za dźvie chviliny da vychadu z pavietranaj prastory, i paśla hetaha «pradstaŭnik śpiecsłužbaŭ» pakinuŭ zału kantrolu palotaŭ.
U prezientacyi taksama akcentujecca ŭvaha na tym, što paviedamleńnie pra bombu, nibyta adpraŭlenaje rucham Chamas, było atrymanaje aeraportami Vilni, Afin, Safii, Bucharesta i Kijeva ŭ pieryjad z 9:25 da 09:34 univiersalnaha času, a ŭ aeraport Minska jano pastupiła tolki a 09:56 univiersalnaha času. Samalot sieŭ u minskim aeraporcie kala 10:00 univiersalnaha času (13:00 pa Minsku).
Polski bok taksama prademanstravaŭ videazapisy dziejańniaŭ u aeraporcie Minska i pakazvaje, što dziejańni słužačych nie byli adekvatnyja pahrozie vybuchu, ab jakoj paviedamlałasia ŭ pieramovach.