SB: «Łukašenka moža skazać Zachadu dziakuj za sankcyi». Ekanamist: «Heta dziciačaja pamyłka!»
Dziaržaŭnaja haziety «SB» pieradrukavała natatku danieckaha žurnalista Alaksieja Iljaševiča. Jon piša, što abjomy źniešniaha handlu Biełarusi z ZŠA i ES rastuć rekordnymi tempami. «Ciapier Łukašenka moža skazać Zachadu dziakuj za sankcyi suprać Biełarusi. Stanoŭčy efiekt ad ich ličycca miljardami», — śćviardžaje Iljaševič. Sapraŭdy, sankcyi iduć Biełarusi na karyść? Zusim naadvarot, kaža ekanamist Kaciaryna Barnukova.
23.11.2021 / 18:35
«Za studzień-vierasień 2021 hoda biełaruski ekspart u krainy JEZ vyras amal na $3,5 młrd (abo na 96%)», — pryvodzić ličby daniecki ekśpiert.
Barnukova tłumačyć:
«Hety rost sapraŭdy jość, heta statystyčny fakt. I pa časie heta sapraŭdy supadaje z uviadzieńniem sankcyj. Voś tolki nijakim čynam hety rost nie źviazany z uviadzieńniem sankcyj, zaŭvažym, što navat u artykule «SB» nie apisvajucca miechanizmy, jak sankcyi ŭpłyvajuć na rost ekspartu.
Fota rw.by
Hety rost — vynik mižnarodnaj kanjuktury. Suśvietnaja ekanomika adnaŭlajecca paśla kavidnaj pandemii i aktyŭna raście. Što viadzie i da rostu popytu, i da rostu koštaŭ, u tym liku, na kalijnyja ŭhnajeńni, mietały, naftapradukty. I tut treba razumieć, kali ekspart vyras na 30%, naprykład, heta nie značyć, što pradali na 30% bolš adzinak čahości — častkova vyraśli abjomy, ale častkova i košty.
Popyt raście va ŭsich krainach, na ŭsie tavary, nie tolki na biełaruskija tavary ŭ ZŠA, jak heta padajecca.
Čamu hety rost nijak nie moža być źviazany z sankcyjami? Jany prosta jašče nie pačali dziejničać. Usie surjoznyja sankcyi, jakich nie tak i šmat na samaj spravie, majuć adkładzieny efiekt.
Jeŭrapiejskija sankcyi nie dziejničajuć na kantrakty, jakija padpisvalisia da ŭviadzieńnia hetych sankcyj. Naprykład, pa naftapierapracoŭcy niekatoryja kantrakty buduć dziejničać jašče paŭhoda—hod»
A što ž nakont padziakaŭ Zachadu za sankcyi i pazityŭnaha efiektu ad ich?
«Ja nie vieru, što hety ekśpiert moh ździejśnić takuju dziciačuju pamyłku. Bo kali rečy adbyvajucca adnačasova, heta zusim nie značyć, što adna ź ich vyklikanaja inšaj. Hety ekśpiert prosta adkryta chłusić čytačam.
Bo sankcyi nie mohuć vieści da rostu ekspartu. Kali i buduć niehatyŭnyja nastupstvy ad sankcyj, to ŭ budučyni. Ale i tut jość pytańni, bo ŭviadzieńnie sankcyj maje niuansy, vyklučeńni, dy i čas, kab ahienty mahli padrychtavacca i prydumać niejkija vychady.
Pazityŭnych nastupstvaŭ ad sankcyj być dakładna nie moža. U artykule nie apisvajecca miechanizm hetych pazityŭnych nastupstvaŭ, bo jaho prosta nie isnuje», — kaža Kaciaryna Barnukova.