Doŭha zasynajecie pa načach? Voś što možna z hetym zrabić — karysnyja parady
U siarednim nam treba 15 chvilin, kab zasnuć. Časam my adčuvajem siabie zanadta stomlenymi i nie chočam čakać navat taki pramiežak času, ale ž i imhniennaje zasynańnie — drenny znak. Jon śviedčyć pra surjozny niedachop snu, što moža paškodzić jak fizičnamu, tak i psichičnamu zdaroŭju.
06.10.2021 / 21:12
Fota depositphotos.com.
Darosłym treba jak minimum 7 hadzin snu kožnuju noč. U svaju čarhu, norma dla dziaciej małodšaha školnaha ŭzrostu — 9-12 hadzin, dla padletkaŭ — 8-10 hadzin.
Kali ž vy śpicie dastatkova hadzin, ale ŭsio roŭna imhnienna zasynajecie kožny viečar, heta moža śviedčyć pra drennuju jakaść vašaha snu, piša CNN.
Jakaść snu moža paharšacca, naprykład, praz šmatlikija abudžeńni i ŭ cełym praz pavyšeńnie aktyŭnaści niervovaj sistemy na praciahu nočy. Takija pracesy pieraškadžajuć mozhu pierajści da bolš hłybokich faz snu, krytyčna važnych dla jakasnaha adpačynku.
Lepšaje, što možna zrabić, kab vypravić situacyju — dazvalać sabie spać jak maha daŭžej.
Varta taksama być uvažlivym da siabie, bo niekatoryja chvaroby ŭpłyvajuć na jakaść snu. Siarod ich chraničnaje abstruktyŭnaje apnoe — źjava, kali nočču dychańnie robicca mienš hłybokim ci ŭvohule spyniajecca na karotkija pramiežki času. Taksama son moža paharšacca praź sindrom niespakojnych noh, dyjabiet, astmu, piakotku i inšyja chvaroby, a taksama praz pryjom niekatorych lekaŭ.
Što rabić, kali na zasynańnie treba bolš času, čym 10—20 chvilin?
Možna, naprykład, ustać z łožka i pajści ŭ inšy pakoj. Tam uklučycie ćmianaje śviatło i pačnicie rabić niešta spakojnaje, naprykład, pasprabujcie pačytać. Kali znoŭ adčujecie sanlivaść, možacie viartacca ŭ paściel.
Hałoŭnaje — nie zastavacca ŭ łožku, kali vy adčuvajecie biassońnicu, bo tady vy pačniacie asacyiravać paściel z hetaj niepryjemnaj źjavaj.
Ekśpierty rajać nie pracavać i nie karystacca hadžetami ŭ paścieli, u ideale navat nie hladzieć telebačańnie. Błakitnaje śviatło ad hadžetaŭ sadziejničaje tamu, kab mozh pračynaŭsia, a nie zasynaŭ.
U dadatak, kali mozh usprymaje paściel vyklučna jak miesca dla snu i seksu, heta taksama spryjaje lepšamu zasynańniu.
Umovy snu taksama važnyja. U pakoi, dzie vy śpicie, pavinna być ciopła i chaładnavata (15—20 hradusaŭ Celsija).
Pierad snom varta prytrymlivacca viačerniaha rasparadku, jaki dapamoža nastroicca na adpačynak. Naprykład, pačyścicie zuby, prymicie ciopłuju vannu ci duš i pryśviacicie čas čytańniu knihi ci prasłuchoŭvańniu spakojnaj muzyki pry niajarkim śviatle.
Starajciesia kłaścisia spać u adzin i toj ža čas.
Kab supakoić niespakojny rozum pierad snom, možna praktykavać miedytacyju ci hłybokaje dychańnie.
Jašče adzin varyjant — trymać kala łožka natatnik i zapisvać tudy lubyja dumki, što vas turbujuć, kab vykinuć ich z hałavy.