Fatohraf, zachaplajecca technałohijami i aŭto — kalehi pra zatrymanaha žurnalista «Kamsamołki» Hienadzia Mažejku
1 kastryčnika byŭ zatrymany žurnalist «KP» — Biełaruś» Hienadź Mažejka — aŭtar materyjała, dzie pra Andreja Zelcera, jaki zastreliŭ supracoŭnika KDB Biełarusi, vykazałasia jahonaja adnakłaśnica. Kalehi žurnalista raspaviadajuć, chto taki Hienadź Mažejka i što viadoma ab jaho prafiesijnych intaresach.
02.10.2021 / 21:04
Fota z sacyjalnych sietak
Hienadź pracuje ŭ biełaruskaj «Kamsamołcy» bolš za dziesiać hadoŭ — z 2009-ha. Jaho prafiesijnyja intaresy dosyć šyrokija, ale asabliva časta Hienadź piša na aŭtamabilnuju tematyku, pra avijatranspart, technałohii i horad. Niaredka piša pra Miensk 60—90-ch — pra toje, što znachodziłasia ŭ tym ci inšym miescy horada paru dziasiatkaŭ hadoŭ tamu.
Hienadź nie raz pisaŭ ab vystavie ŭzbrajeńniaŭ MILEX, u apošnim materyjale raspaviadaŭ ab pieršym biełaruskim BTR, bieśpiłotnym viertalocie-palaŭničym i inšych navinkach vystavy. Sustrakaŭ novy Boeing z vasilkom, jaki prylacieŭ u Miensk. Byŭ na zavodzie Embraer — adnaho z najbujniejšych u śviecie vytvorcaŭ samalotaŭ. Dla hetaha Hienadź Mažejka lataŭ u Braziliju. Pastajanna aŭtar «KP» pisaŭ ab vajennaj technicy na paradach 9 Maja i 3 Lipienia.
Fota z sacyjalnych sietak
Akramia taho, što Hienadź Mažejka pracuje ŭ jakaści karespandenta, jon zajmajecca i fotazdymkaj. U 2011 hodzie zaniaŭ druhoje miesca ŭ fotakonkursie Belarus Press Photo sa zdymkam biełaruskaha paeta i kandydata ŭ prezidenty Uładzimira Niaklajeva padčas pieradvybarčaha tura pa krainie.