Siłaviki raskrytykavali Synesis i pieradali prava sačyć za biełarusami Biełtelekamu. Chto raspracuje novuju prahramu?
Namieśnik ministra ŭnutranych spraŭ Kazakievič raskrytykavaŭ dačynnuju kampaniju Synesis, jakaja zajmajecca videanazirańniem u mietro, maŭlaŭ, «MUS adznačaje krajnie nizki ŭzrovień, tempy raźvićcia i funkcyjanał». Havorka idzie pra Kipod.
19.08.2021 / 09:00
Eks-siłavik HUBAZiK śćviardžaŭ, što raspracoŭku Synesis vykarystoŭvali dla identyfikacyi ŭdzielnikaŭ pratestaŭ. Kampanija była niazhodnaja z abvinavačvańniem
Taksama MUS nie zadavalniaje «kolkaść kamier i intelektualnyja zdolnaści pradukta Kipod u śfiery achovy hramadskaha paradku, naprykład indentyfikacyja tvaraŭ». Śćviardžajecca, što ciapier apierataram sistemy budzie Biełtelekam.
Synesis chacieła zarabić, a patrapiła pad sankcyi
Jašče ŭ červieni stała zrazumieła, što budučynia Kipod u Biełarusi sprečnaja.
Spačatku mierkavałasia, što Synesis (havorka pra dačku kampanii «24ch7 Panoptes») stanie apierataram «Respublikanskaj sistemy manitorynhu hramadskaha paradku» i raspracuje pradukt, da jakoha buduć padklučanyja sotni tysiač kamier pa ŭsioj krainie. U vyniku apieratar budzie mieć hrošy ad abanientaŭ (tych, chto ŭstanaviŭ sabie videanazirańnie), a siłaviki — infarmacyju. Pavodle tendara, vyjhranaha ŭ 2017 hodzie, kampanija pavinna była padklučyć 360 tysiač videakamier da kanca 2023 hoda.
Ale ŭ realnaści akazałasia, što dziaržava nie zmahła zabiaśpiečyć padklučeńnie navat svaich abjektaŭ: kamiery darahija, abanieckaja płata taksama. Chto ź biudžetnych ustanovaŭ budzie padklučać sistemu videanazirańnia, kali i na bolš pilnyja patreby hrošy nie zaŭsiody jość? Z pryvatnikam historyja takaja ž — lišnich hrošaj zaraz niama i ŭ ich.
Dla Synesis heta była b dobraja mahčymaść abkatać svaju sistemu, kab potym pradać jaje dalej, na bolš zamožnyja rynki. Ale analityki ličać, što cana pasłuhi była nierelevatnaja biełaruskim realijam. Na siońnia ŭ sistemie zarehistravana 700 kamier, 515 ź jakich — u mietro.
Kiraŭnik Synesis Alaksiej Šatroŭ. Fota: Alaksandr Hlebaŭ, probusiness.io
Były supracoŭnik HUBAZiK Stanisłaŭ Łupanosaŭ, jakoha SK abvinavačvaje ŭ źlivie słužbovaj infarmacyi, śćviardžaŭ, što z dapamohaj płatformy Kipod siłaviki vyličvali ŭdzielnikaŭ pratestaŭ u 2020 i 2021 hodzie. Synesis abviarhała heta:
«Zadača płatformy Kipod, na bazie jakoj pracuje Respublikanskaja sistema manitorynhu hramadskaj biaśpieki, — pošuk raniej identyfikavanych asobaŭ. Heta maje praktyčnuju vartaść, kali havorka idzie ab pošuku ŭžo identyfikavanych ludziej, jakija znachodziacca ŭ respublikanskim vyšuku, źnikli bieź viestak i hetak dalej. Pry hetym zahruzić u bazu ŭsich hramadzian krainy (da prykładu, bazu pašpartoŭ), kab sistema mahła masava identyfikavać usich hramadzian, jakija traplajuć u pole zroku kamier, — technična niemahčyma. Kali čałaviek sistemie nieviadomy, to apieratar moža pasprabavać znajści nieapaznanaha čałavieka pa fota. Dla hetaha jamu ŭ realnym časie treba čakać, kali nieapaznany čałaviek źjavicca ŭ zonie kamier sistemy, kab potym apieratyŭna nakiravać da jaho pravaachoŭnikaŭ. Praces nahadvaje, chutčej, śpiecapieracyju, Synesis ab praviadzieńni takich mierapryjemstvaŭ nieviadoma».
Napačatku hoda ŭ praŭładnych kołach zahavaryli, što prava być techničnym apierataram respublikanskaj sistemy treba pieradać Biełtelekamu. Namieśnik ministra MUS udakładniaŭ, što pasłuhi dziaržaŭnaj kampanii abyducca tańniej, Łukašenka pastaviŭ zadaču, kab finansavałasia heta nie tolki ź biudžetu, to-bok arhanizavać dziaržaŭna-pryvatnaje partniorstva.
«24ch7 Panoptes» vychodzić z hetaj historyi ŭ kiepskim stanie, nieviadoma, ci atrymajecca adbić zatračanyja na raspracoŭku Kipod hrošy. Miesiačnaja vyručka ŭ druhim kvartale 2021 hoda, pa viadomaj «Našaj Nivie» infarmacyi (aficyjna kamientavać paradak ličbaŭ i ich sapraŭdnaść u Synesis admovilisia — NN), składała kala 90 tysiač rubloŭ, miesiačnyja vydatki — kala 180 tysiač rubloŭ. Niaspłočanych kredytaŭ — na 3,7 miljonaŭ rubloŭ.
Da taho ž, viartać hrošy daviadziecca i biznesmenu Alaksieju Aleksinu, jaki niekali ŭvachodziŭ u «Sinezis» jak čysty inviestar, ale nie atrymaŭ čakanaha prybytku i, pa našaj infarmacyi, prosić častku inviestycyj nazad.
U kancy 2020 hoda Synesis trapiła pad jeŭrapiejskija sankcyi. Kampanija sprabuje damahčysia, kab jaje vyklučyli z «čornaha śpisu», ale pakul biezvynikova.
A chto ŭźniknie zamiest Kipod?
Biełtelekam budzie tolki apierataram, ale sam soft pavinien być napisany nanova, apieratar musić abrać vykanaŭcu. U aficyjnych krynicach paviedamlajecca, što «raspracoŭščykam budzie nacyjanalnaja IT-kampanija, što stanie dadatkovym faktaram zabieśpiačeńnia biaśpieki sistemy».
«Takija kampanii ŭ krainie jość», — udakładniaje Kazakievič.
Pa infarmacyi «Našaj Nivy», najbolšyja šancy stać novym raspracoŭščykam softu ŭ kampanii Navek Soft, jana ŭžo maje ščylnyja suviazi ź Biełtelekamam i dziaržaŭnymi orhanami i ŭžo absłuhoŭvaje šyrokuju sietku kamier.
Navek Soft źjaŭlajecca dačynnaj kampanijaj «Mabilnaha siervisa», jakaja fihuravała ŭ kryminalnaj spravie byłoha namieśnika kiraŭnika Rady biaśpieki Biełarusi. Tady za padbor «pravilnych» pastaŭščykoŭ u turmu adpravilisia i Andrej Uciuryn z Rady biaśpieki (12 hadoŭ kałonii, padbuchtorvaŭ da dačy chabaraŭ, sam atrymaŭ chabar na sumu $190 tysiač), i były hienieralny dyrektara Biełtelekama Siarhiej Sivadziedaŭ (7 hadoŭ, atrymaŭ chabaraŭ na sumu $470 tysiač i €15 tysiač), i «faktyčny kiraŭnik», pavodle KDB, «Mabilnaha siervisa» — Uładzimir Žylin (4 hady kałonii za daču chabaru na sumu zvyš $900 tysiač). Prysud ustupiŭ u siłu ŭ lipieni 2020-ha, u biznes-kołach kažuć, što Žylin užo na svabodzie.
Sud pa «spravie Uciuryna». Fota: Onliner.by
Ale kampanija praciahvaje isnavać i akazvać pasłuhi dziaržaŭnym arhanizacyjam. Ciapier jaje źviazvajuć ź imionami dvuch bratoŭ — Juryj Laŭdanski i Jaŭhien Laŭdanski (na momant padrychtoŭki materyjała dziaržaŭny rejestr jurydyčnych asob pa techničnych pryčynach niedasiažny).
Mienavita «Mabilny siervis», vyhladaje, pastaŭlaŭ u Biełaruś ilvinuju častku abstalavańnia, što dazvalaje śpiecsłužbam sačyć za hramadzianami. Voś, naprykład, častka «rašeńniaŭ», jakija jany prapanujuć dziaržavie.
Ich dačynny Navek Soft taksama prapanuje pasłuhi, jakija mohuć być cikavyja siłavikam. Kampanija źjaŭlajecca rezidentam Parka vysokich technałohij.
Ale samaja hałoŭnaja suviaź zhadanych kampanij ź Biełtelekamam u tym, što Navek Soft źjaŭlajecca partnioram Biełtelekama ŭ realizacyi pasłuhi «Videakantrol».
Pradaje pasłuhu Biełtelekam, a intelektualnuju častku i pastaŭki techniki zabiaśpiečvajuć Navek Soft i inšyja kampanii «Mabilnaha servisa».
Cmianyja abstaviny pastavak abstalavańnia i prahramnaha zabieśpiačeńnia dla «Videakantrola» taksama fihuravali ŭ «spravie Biełtelekama».
Ciapier «Videakantrol» prapanuje ŭstanoŭku kamier, da jakich budzie dostup u režymie realnaha času. Mnohija kamiery, jakija prypisvalisia Synesis ciaham 2020-ha hoda, naležać Biełtelekamu.
Biahučaja sistema «Videakantrola» nie zajaŭlaje takija ž mocnyja intelektualnyja zdolnaści, jak Synesis, ale ŭžo maje nieparaŭnalna bolš kamier u krainie.
Faktyčna pytańnie zastajecca ŭ tym, kab intehravać u isnuju infrastrukturu servisa mahčymaść analizavać videa — raspaznavać tvary, što samo pa sabie ŭžo nie źjaŭlajecca ŭnikalnaj technałohijaj.
Vypadkovaść ci nie, ale Navek Soft užo vystaviŭ śviežuju vakansiju na «raspracoŭku i padtrymku funkcyjanału siervieraŭ videanazirańnia».
My sprabavali atrymać kamientar u kampanii Navek Soft, adnak sakratar paśla kansultacyj z kiraŭnictvam adkazała: «Na hetaje pytańnie my kamientaroŭ nie dajom».
Paśla vybaraŭ 2010 hoda «Biełtelekam» patrapiŭ pad zachodnija sankcyi. Na ciapierašni momant kampanija nie ŭklučanaja ŭ «čorny śpis».