Kolki budzie kaštavać Biełarusi avijabajkot u vyniku pasadki Ryanair
I «Biełaeranavihacyja», i «Biełavija» prynosili Biełarusi vialikija prybytki.
25.05.2021 / 20:55
Pierš za ŭsio ad spynieńnia avijaznosin ź ES pacierpić nacyjanalny pravajdar aeranavihacyjnych pasłuh «Biełaeranavihacyja».
Minski centr kiravańnia pavietranym rucham absłuhoŭvaje 980 kampanij sa 100 krain śvietu. 83% palotaŭ prychodzicca na tranzitny patok, 17% — z pasadkami ŭ Biełarusi. Aktyŭniej za ŭsio pavietranuju prastoru Biełarusi vykarystoŭvali rasijskija avijakampanii.
Bolš za toje, usie hruzavyja rejsy ź Blizkaha Uschodu ŭ ZŠA i ź Jeŭropy ŭ Kitaj prachodzili praź Biełaruś. U apošnija dapandemičnyja hady «Biełaeranavihacyja» mahła zarablać da $50—70 miljonaŭ štohod na dyśpietčarskim absłuhoŭvańni zamiežnych avijakampanij. Navat kali častka tranzitu zachavajecca, straty buduć vyličacca dziasiatkami miljonaŭ dalaraŭ štohod.
Što datyčyć «Biełavii», kampanija zarablała najbolš na tranzicie pasažyraŭ miž Rasijaj i Ukrainaj. Hety kirunak raźviŭsia paśla taho, jak u 2015 hodzie spynilisia pramyja avijaznosiny miž Rasijaj i Ukrainaj. Pa vynikach 2017 hoda dola tranśfiernych pasažyraŭ na rehularnych rejsach «Biełavii» składała 49%. Tamu zakryćcio palotaŭ u ES i va Ukrainu budzie najmacniejšym udaram dla biznesu avijakampanii.
Vyručka «Biełavija» za dapandeimičny 2019 hod skłała kala 883 miljonaŭ biełaruskich rubloŭ (kala 430 młn USD). Pry hetym čysty prybytak «Biełavija» i ŭ 2018, i ŭ 2019 hadach skłaŭ bolš za 68 miljonaŭ BYN (kala 33 młn USD). Zabarona na paloty «Biełavija» ŭ krainy Jeŭrasajuza i Ukrainu, takim čynam, pryviadzie da źnižeńnia abarotaŭ navat na sotni miljonaŭ za hod i z usioj imaviernaściu zrobić biełaruskuju nacyjanalnuju kampaniju stratnaj.
Ale najbolšyja straty Biełarusi buduć uskosnyja — ad sankcyj i izalacyi, u jakija kraina traplaje paralelna. Dla zachodniaha biznesu Biełaruś robicca izhojem, dla kitajskaha i arabskaha kapitału jana, adpaviedna, taksama ŭ adzin momant pierastaje być pryvabnaj. Kraina stračvaje svaje tranzitnyja pieravahi i pierastaje razhladacca jak tramplin u rehijon.