SK zavioŭ kryminalnyja spravy na Alaksieja Lavončyka i Andreja Stryžaka

Śledčy kamitet raspačaŭ kryminalnuju spravu ŭ dačynieńni da Andreja Stryžaka i Alaksieja Lavončyka. Ich abvinavačvajuć u finansavańni dziejnaści ekstremisckaha farmavańnia i padrychtoŭcy asob dla ŭdziełu ŭ hrupavych dziejańniach, jakija hruba parušajuć hramadski paradak, paviedamlaje pres-słužba viedamstva.

12.04.2021 / 10:56

Alaksiej Lavončyk

Pa hetaj kryminalnaj spravie abvinavačanymi pryznanyja Andrej Alaksandraŭ i Iryna Złobina.

Pavodle SK, «padčas papiaredniaha rasśledavańnia śledčymi va ŭzajemadziejańni z HUBAZiK MUS vyjaŭlenyja fakty arhanizacyi i pieradačy Alaksiejem Lavončykam i Andrejem Stryžakom z dapamohaj inšych asob hrašovych srodkaŭ dla nastupnaha ich vykarystańnia ŭ złačynnaj dziejnaści Alaksandrava i Złobinaj». U dalejšym hrošy Alaksandraŭ i Złobina vykarystoŭvali dla apłaty (jak asabista, tak i praź inšych asob) štrafaŭ za ŭčynienyja inšymi asobami (udzielnikami pratestaŭ) administracyjnyja pravaparušeńni, a taksama kampiensacyi naniesienaj ich supraćpraŭnymi dziejańniami škody.

Pavodle śledstva, Alaksiej Lavončyk źjaŭlajecca suzasnavalnikam i kiraŭnikom arhanizacyi BY_help, dziejnaść jakoj nakiravanaja na apłatu paniesienych vydatkaŭ asob, jakija ŭdzielničajuć u pratestach.

Pavodle SK, Andrej Stryžak uvachodzić u skład Kaardynacyjnaj rady, «meta jakoj — zachop ułady niekanstytucyjnym šlacham», a taksama źjaŭlajecca suzasnavalnikam BY_help i BYSOL. Arhanizacyja BYSOL «zajmajecca finansavańniem strajkamaŭ pradpryjemstvaŭ, destruktyŭnych dvarovych supolnaściaŭ, tak zvanych fondaŭ miedycynskaj, spartyŭnaj i kulturnaj salidarnaści. Ustanoŭlena, što abjadnańni ciesna ŭzajemadziejničajuć pamiž saboj».

Dziejańni Lavončyka i Stryžaka kvalifikavanyja śledstvam pa:

— 342 (Inšaja padrychtoŭka asob dla ŭdziełu ŭ hrupavych dziejańniach, jakija hruba parušajuć hramadski paradak) Kryminalnaha kodeksa Respubliki Biełaruś;

— 361-2 (Finansavańnie dziejnaści ekstremisckaha farmavańnia) Kryminalnaha kodeksa Respubliki Biełaruś.

Vyniesienyja pastanovy ab pryciahnieńni ich u jakaści abvinavačanych pa ŭsich vyšejzhadanych złačynstvach. Jany abvieščanyja ŭ miždziaržaŭny vyšuk.