Na praśpiekcie Niezaležnaści za fatahrafavańnie techniki zatrymali dvuch bratoŭ — kožnamu dali pa 30 sutak. A doma mama ź insultam
27 sakavika ŭ Minsku zatrymali dvuch rodnych bratoŭ, Ivana i Siarhieja Brusavych. Praź dzień abodva atrymali ad sudździ Maksima Trusieviča pa 30 sutak.
29.03.2021 / 14:21
Braty Siarhiej i Ivan Brusavy 27 sakavika viartalisia dadomu pa praśpiekcie Niezaležnaści. Mima prajazdžała vajennaja technika, jakuju jany vyrašyli sfatahrafavać. Sudu Ivan rastłumačyŭ, što techniku jany zdymali, bo jana im spadabałasia. Ab hetym śviedčyć i videa, jakoje jany zapisali. Fatahrafavańnie zaŭvažyli supracoŭniki milicyi i zatrymali ich, paviedamlajuć pravaabaroncy.
U Pieršamajskim RUUSie na bratoŭ skłali adrazu pa dva pratakoły: pa art. 24.23 i 24.3 KaAP — heta «mitynh» i «niepadparadkavańnie».
Na sudzie braty prasili nie karać ich sutkami, bo ich maci niadaŭna pieraniesła insult, joj patrabujecca dapamoha. Vyrak sudździ Maksima Trusieviča — pa 30 sutak kožnamu.
41-hadovy Siarhiej Brusaŭ
32-hadovy Ivan Brusaŭ
«Naša Niva» źviazałasia z Taćcianaj Ivanaŭnaj, mamaj bratoŭ. Žančyna nie viedaje padrabiaznaściaŭ zatrymańnia — kaža sa słoŭ dziaŭčyny adnaho z synoŭ, što jany vyjšli ŭ kramu, paśla čaho źnikli.
Pra zatrymańnie synoŭ i sud žančyna ŭvohule nie viedała — daviedałasia ad žurnalistaŭ.
Taćciana Ivanaŭna raspaviała pra synoŭ: abodva zarablajuć na žyćcio chałturami, padpracoŭvajuć u pryvatnikaŭ. Abodva raźviedzienyja, abodva majuć sudzimaści za bojki. Pa słovach maci, Brusavy palitykaj asabliva nie cikavilisia, u mitynhach i akcyjach nie ŭdzielničali. Raniej za ŭdzieł u niesankcyjanavanych mierapryjemstvach bratoŭ nie zatrymlivali.
Taksama Taćciana Ivanaŭna paćvierdziła, što sapraŭdy niadaŭna pieraniesła insult — ciapier nie vychodzić z kvatery.