«Heta biesčałaviečna», — baćka palitviaźnia Mikałaja Dziadka źviarnuŭsia da ŭładaŭ

23.12.2020 / 14:29

Były sudździa Alaksandar Dziadok — baćka anarchista Mikałaja Dziadka, jakoha druhi miesiac trymajuć u SIZA na Vaładarskaha praz abvinavačańnie ŭ padrychtoŭcy dziejańniaŭ, jakija hruba parušajuć hramadzki paradak, paviedamlaje Radyjo Svaboda

Dniami ŭ baćki palitviaźnia źjavilisia źviestki, što zdaroŭju i žyćciu jahonaha syna ŭ turmie pahražajuć.

Pra heta raskazała dziaŭčyna Mikałaja, spasłaŭšysia na krynicy ŭ izalatary.

«Adzin ź viaźniaŭ «Vaładarki» zmoh pieradać praz svaju maci, što Mikałaja tam chočuć zabić, stvarajuć umovy, kab jon pamior. Ale što heta aznačaje — pahroza zarazicca karanavirusam ci niešta inšaje, vyśvietlić my nia možam», — raskazaŭ Alaksandar Dziadok. Baćkoŭ Mikałaja Dziadka hetaja infarmacyja vielmi zaniepakoiła, ale spraŭdzić jaje akazałasia niemahčyma: nijakich kantaktaŭ z synam niama i sproby naładzić hetyja kantakty akazalisia marnymi.

«14-ja kamera, dzie jon ciapier znachodzicca, na karantynie praz karanavirus. Nibyta tamu advakata na sustreču ź im nie dapuskajuć. Apošni list ad syna byŭ 29 listapada — bolš ni słova nia možam atrymać. Navat nia viedajem, jon chvory na «karonu» ci nie.

Kali telefanujem u administracyju SIZA, tam kažuć, kab my źviartalisia da ich piśmova, i jany praz dva tydni adkažuć. Ale čakać niemahčyma: serca razryvajecca, kali havorać ab pahrozie žyćciu, a ty nia viedaješ, što z synam. Mušu źviarnucca ŭ medyja, kab słužbovyja asoby daviedalisia maju dumku: biesčałaviečna blakavać infarmacyju pra ludziej, jakija apynulisia za kratami ŭ taki niebiaśpiečny čas, jak pandemija. Heta supiarečyć zakonu i normam marali», — miarkuje Dziadok-starejšy.

Alaksandar Dziadok i jahonaja žonka sami chvarejuć na karanavirus. Jany znachodziacca doma na samaizalacyi treci tydzień, ich mahčymaści abaranić pravy syna abmiežavanyja.

Anarchist Mikałaj Dziadok byŭ zatrymany 12 listapada ŭ pasiołku Sasnovym Asipovickaha rajonu, dzie jon pražyvaŭ apošni čas. Pry zatrymańni supracoŭnikami HUBAZiKu Dziadok byŭ mocna pabity. Pavodle pravaachoŭnikaŭ, u Mikałaja Dziadka znajšli vialikuju sumu hrošaj, «kaktejli Mołatava», ulotki i nalepki. Viadoma, što Mikałaj Dziadok viny nie pryznaje.

Na kanśpiratyŭnaj kvatery ŭziali lidara anarchistaŭ Dziadka. Pahladzicie, u jakim jon stanie paśla zatrymańnia VIDEA

U pieršaj pałovie listapada baćka Mikałaja Dziadka padaŭ u Śledčy kamitet zajavu pa fakcie źbićcia syna. Alaksandar Dziadok nazvaŭ abychodžańnie z synam katavańniem, jon śćviardžaje, što padčas dopytaŭ Mikałaja da jaho ŭžyvali haz. Ci adreahavaŭ Śledčy kamitet na skarhu pra katavańnie?

«Tak. Tydzień tamu SK adkazaŭ, što toje, pra što ja pišu ŭ skarzie pra katavańni, budzie pravierana padčas raśśledavańnia kryminalnaj spravy, zaviedzienaj na majho syna», — raskazaŭ Dziadok-starejšy.

Znajomaja Mikałaja Dziadka, jakaja paviedamiła baćkam anarchista pra niebiaśpieku jahonamu žyćciu i zdaroŭju na «Vaładarcy», ad kantaktaŭ z karespandentam Svabody admoviłasia.