Namieśnica ministra achovy zdaroŭja admoviłasia adkazvać na pytańni žurnalistaŭ na bryfinhu
24.04.2020 / 18:11
Siońnia adbyŭsia bryfinh dla žurnalistaŭ u Ministerstvie achovy zdaroŭja Biełarusi. Jaho dała namieśnica ministra Alena Bohdan. Jana dakłała padrychtavanuju infarmacyju, ale admoviłasia adkazvać na pytańni.
Siarod inšaha, Alena Bohdan paviedamiła, što rost kolkaści pnieŭmanij nazirajecca va ŭsich rehijonach krainy, akramia horada Viciebska, dzie ich kolkaść stabilizavałasia.
«My pastavili zadaču maksimalnaha vyjaŭleńnia i papiaredžvańnia zachvorvańnia — usio pnieŭmanii siońnia my rasceńvajem, jak karanavirusnyja», — adznačyła Alena Bohdan. Havorka tut nie pra ŭlik ich jak karanavirusnych, a pra padychody da raźmiaščeńnia pacyjentaŭ, miery zaściarohi miedpiersanału i mietodyki lekavańnia.
Pavodle infarmacyi «Našaj Nivy» ź miescaŭ, u mnohich haradach, siarod jakich Viciebsk, Minsk, Łuniniec, Stoŭbcy, Dokšycy, Biešankovičy, Ušačy, kolkaść pnieŭmanij značna, u razy, pieravyšaje ŭzrovień minułaha hoda na toj ža pieryjad. U toj ža čas kolkaść aficyjna zarehistravanych vypadkaŭ karanavirusnaj infiekcyi pakul značna mienšaja za kolkaść vyjaŭlenych pnieŭmanij — choć absalutnaja bolšaść infikavanych pieranosiać COVID-19 biez raźvićcia pnieŭmanii, u pałovie vypadkaŭ navat bieśsimptomna.
Ciapier u Biełarusi zadziejničana pałova z balničnych łožkaŭ, zareziervavanych dla lekavańnia pacyjentaŭ z karanavirusnaj infiekcyjaj, zajaviła Alena Bohdan.
Usiaho pad lekavańnie pacyjentaŭ z karanavirusam vyznačana kala 9500 łožkaŭ, bolš za 600 ź ich abstalavanyja aparatami štučnaj vientylacyi lohkich, skazała jana.
Na siońnia, paviedamiła jana, u stacyjanarach lažać 4733 pacyjenty z COVID-19. Astatnija majuć lohkuju formu zachvorvańnia i lakujucca doma.
«Pad asablivym kantrolem znachodziacca 114 čałaviek, u tym liku i na aparatach štučnaj vientylacyi lohkich», — adznačyła Alena Bohdan.
Usiaho ŭ Biełarusi prykładna 70 tysiač balničnych łožkaŭ i 2300 aparataŭ štučnaj vientylacyi lohkich. Pa hetych pakazčykach Biełaruś adnosicca da hrupy samych zabiaśpiečanych u śviecie krain.
U baraćbie z karanavirusam zadziejničana 18% ad ahulnaj kolkaści daktaroŭ i 18% ad kolkaści siaredniaha miedpiersanału, zajaviła Alena Bohdan.
Alena Bohdan taksama ŭpieršyniu ad imia Ministerstva pryniesła spačuvańni siemjam pamierłych ad karanavirusnaj infiekcyi. Raniej hramadskaść krytykavała ŭłady Biełarusi za adsutnaść takich słoŭ spačuvańnia.
Farmat bryfinhu moža praduhledžvać adkazy na pytańni, a moža i nie praduhledžvać. Na hetym tydni pradstaŭniki Minzdaroŭja ni razu nie praviali pres-kanfierencyi, jany abmiežavalisia adnym strymam, dzie pytańni adbiralisia arhanizatarami.