Usio ž rasstreł: adchilili apielacyju žychara Łuninca, jaki adrezaŭ hałavu niemaŭlaci
31.01.2020 / 12:44
31 studzienia Viarchoŭny sud vyrašyŭ, što 48-hadovy Viktar Sierhiel z Łuninca ŭsio ž zasłuhoŭvaje śmierci.
Viktar Sierhiel
Sierhiel byŭ pryznany vinavatym pa žudasnaj spravie ab zabojstvie 8-miesiačnaj dziaŭčynki. Adbyłosia ŭsio jašče ŭ 2018 hodzie. Mužčyna vypivaŭ doma ŭ svajoj znajomaj, 26-hadovaj Natałli Kołb. Razam jany zabili małuju dačku Natałli. Pryčyny i abstaviny strašnaha ŭčynku nieviadomyja, ale kali z pracy viarnuŭsia muž Natałli Kołb, to ŭbačyŭ u chacie p’ianuju žonku, p’ianaha hościa i miortvaje cieła svajoj dački na padłozie. Dziaŭčynku žorstka źbili i adrezali joj hałavu.
Paśla hetaha Natałlu Kołb i Viktara Sierhiela zatrymali. U kastryčniku 2019 hoda Brescki abłasny sud ahučyŭ vyrak: i Natałla, i Viktar atrymali maksimalna mahčymyja pakarańni. Sierhielu prysudzili rasstreł, a Kołb — 25 hadoŭ pazbaŭleńnia voli (u Biełarusi śmiarotnaje pakarańnie ci pažyćciovy termin žančynam nie prysudžajucca).
Ale ž Viktar Sierhiel paśla prysudu padaŭ apielacyju (pa infarmacyi partała tut.by, sam Sierhiel nie asprečvaŭ prysud, apielacyja była idejaj jaho advakataŭ). Ale Viarchoŭny sud vyrašyŭ, što litaści mužčyna nie zasłuhoŭvaje. Takim čynam, Sierhiela rasstralajuć.