Трыбуна Лукашэнкі на парадзе будзе з кандыцыянерам
02.07.2019 / 14:57
У Мінску заканчваецца падрыхтоўка да ваеннага парада да Дня Незалежнасці — ён пройдзе вечарам 3 ліпеня. Ужо паставілі трыбуны, велізарныя святлодыёдныя экраны, дадатковае асвятленне. А за VIP-трыбунай, з якой за парадам назірае Аляксандр Лукашэнка і яго набліжаныя асобы, паставілі вялізны прамысловы кандыцыянер, піша kp.by
Апарат вядомай японскай фірмы Daikin важыць 580 кілаграм і мае магутнасць астуджэння — 35,5 кілават. Для параўнання, магутнасць звычайных хатніх спліт-сістэм — 2—3 кілаваты. Вялізныя тэрмаўстойлівыя трубы ад кандыцыянера заведзены пад трыбуну. Верагодна, з іх халоднае паветра будзе астуджаць прэзідэнта і іншых VIP-гасцей.
Такі кандыцыянер звычайна ставяць на дах, ён можа астуджаць паветра ў памяшканні плошчай 100 квадратных метраў. Кошт такога кандыцыянера — каля 20 тысяч еўра.
Раней Аляксандр Лукашэнка казаў, што не любіць спякоту і пляжны адпачынак.
— Наогул трываць не магу, — казаў ён.