Stała viadoma pra zvanki Skrypala rodnym paśla atručańnia

Były pałkoŭnik HRU Siarhiej Skrypal, jaki ŭ sakaviku minułaha hoda razam sa svajoj dačkoj Julijaj byŭ atručany niervova-paralityčnym rečyvam u brytanskim Sołśbiery, paśla incydentu telefanavaŭ svajakam u Rasiju. Pra heta piša «Maskoŭski kamsamolec».

23.05.2019 / 15:14

Pa infarmacyi vydańnia, Skrypal nabraŭ numar svajoj plamieńnicy Viktoryi ŭ Jarasłaŭli ŭ čaćvier, 9 maja, adnak jana była niedasiažnaja. Jaho manałoh zapisaŭ aŭtaadkazčyk.

Były pałkoŭnik paskardziŭsia, što doŭhi čas nie moža datelefanavacca da svajački. Jon pavinšavaŭ jaje z Dniom Pieramohi i pacikaviŭsia, jak spravy ŭ jaje siamji. «Nu dobra. U mianie ŭsio narmalna, heta značyć u nas — u Julečki taksama», — skazaŭ Skrypal i paprasiŭ pieradać vinšavańni sa śviatam mamie plamieńnicy.

Jak adznačaje hazieta, heta ŭžo nie pieršy zvanok byłoha pałkoŭnika ŭ Rasiju. Da hetaha jon kamunikavaŭ ź Viktoryjaj z nahody jaje kanfliktu z supracoŭnikam tavarystva ŭłaśnikaŭ žylla i raiŭ mienš pryciahvać da siabie ŭvahu. Pa dadzienych vydańnia, Viktoryja nie sumniavajecca ŭ tym, što joj telefanavaŭ mienavita jaje dziadźka.

U traŭni The Guardian paviedamiła, što padazravanyja ŭ atručańni Skrypala i jaho dački atrymali tajemny zvanok paśla zdareńnia. Pa źviestkach krynic haziety, hety zvanok źjaŭlaŭsia spravazdačaj ab paśpiachovaści apieracyi. Akramia taho, śćviardžaje vydańnie, heta pavialičvaje vierahodnaść taho, što padazravanyja Alaksandr Piatroŭ i Rusłan Bašyraŭ dziejničali nie adny.