Pamior mer Hdańska, paranieny padčas dabračynnaha kancerta
dapoŭniena
14.01.2019 / 16:50
Mer Hdańska Pavieł Adamovič, jakoha paranili nažom padčas kancerta, pamior.
Jamu było 54 hady. U niadzielu jaho atakavali nažom na scenie padčas finału Vialikaha kaladnaha dabračynnaha kancerta. Napadajučym byŭ Stefan V., raniej pakarany za rabavańni.
Adamovič stajaŭ u kucie sceny, kali da jaho padbieh čałaviek i niekalki razoŭ udaryŭ jaho nažom. Meru doŭha akazvali miedycynskuju dapamohu prama na scenie, paśla čaho pavieźli ŭ kliničny centr miedycynskaha univiersiteta Hdańska.
Złačyniec nazvaŭ napad na mera pomstaj partyi «Hramadzianskaja płatforma». Jon prosta na scenie pradstaviŭsia ŭ mikrafon. «Ja siadzieŭ u turmie, choć byŭ nievinavaty. «Hramadzianskaja płatforma» katavała mianie. Voś čamu Adamovič pamior», — skazaŭ napadajučy. Jaho zatrymali supracoŭniki pryvatnaj achoŭnaj kampanii, jakaja adkazvała za biaśpieku na kancercie.
Pavieł Adamovič vykłaŭ u instahram heta fota pierad napadam.
U mai-červieni 2013 hoda napadnik ździejśniŭ sieryju ŭzbrojenych rabavańniaŭ bankaŭ, zabraŭšy ahułam 15 tysiač polskich złotych (kala čatyroch tysiač dalaraŭ). Jaho prysudzili da piaci z pałovaj hadoŭ pazbaŭleńnia voli. Vyzvaliŭsia mužčyna ŭ kancy śniežnia.
Adamoviču zrabili apieracyju. Jaho stan zastavaŭsia vielmi ciažkim. Mer atrymaŭ ranieńni serca, dyjafrahmy i brušnoj połaści. Apieracyja doŭžyłasia piać hadzin, za hety čas pacyjentu pieralili amal 20 litraŭ kryvi. Lekary davali mała šancaŭ na toje, što jon vyžyvie.