Va Ukrainie zabaranili seks biez aficyjnaj zhody

Ci patrebny taki zakon u Biełarusi?

11 studzienia ŭ siłu ŭvajšli źmieny ŭ Kryminalny kodeks Ukrainy, jakija tyčacca seksualnaha hvałtu. Ciapier seks biez zhody ŭ vusnaj, piśmovaj abo nievierbalnaj formie ličycca zhvałtavańniem.

12.01.2019 / 11:04

U Jeŭropie isnuje ŭsiaho dziesiać krain, dzie pavodle dziejučaha zakanadaŭstva na seks nieabchodna atrymać zhodu, siarod ich Vialikabrytanija, Irłandyja, Hiermanija, Kipr. Letam minułaha hoda adpaviedny zakon pryniaŭ i parłamient Šviecyi. Zaraz da hetaha śpisa dałučyłasia Ukraina.

Sutnaść źmien zvodzicca da nastupnaha: kali žančyna (poł achviary nie važny, paciarpiełym moža ličycca i mužčyna, adnak na praktycy havorka idzie pieravažna pra žančyn) nie supraciŭlałasia, heta zusim nie značyć, što jana była zhodnaja na pałavy akt. Mužčyna moh jaje zapałochać, albo nastajać na svaim biez užyvańnia siły, i heta ŭžo budzie ličycca hvałtam. Pasiŭnaść partniora nie aznačaje zhody.

Doŭhi čas zhvałtavańni i inšyja prajavy seks-hvałtu vyznačali praz pryncyp «tolki nie aznačaje nie».

Heta značyć, čałaviek, jaki nie choča seks-kantaktu ź inšym čałaviekam, moža ćviorda zajavić pra svaju niazhodu i, kali hetu zajavu praihnarujuć, usie dalejšyja dziejańni kryŭdziciela možna rasceńvać jak zhvałtavańnie abo hvałt.

Z hetaha času budzie dziejničać kancepcyja dobraachvotnaj zhody, ci «tolki tak aznačaje tak».

Złačynstvam budzie i pałavy akt z čałaviekam, što śpić, tak što partnioram lepiej upeŭnicca zahadzia, što ŭ ich u hetym płanie poŭnaje parazumieńnie.

Adnak jak zrazumieć, što partnior daŭ svaju zhodu?

Novaje zakanadaŭstva traktuje atrymańnie dazvołu na seks davoli šyroka: podpis i piačać u hetym vypadku zusim nie abaviazkovyja. Vusnaha łakaničnaha «tak» budzie dastatkova, i navat možna abmiežavacca nievierbalnaj zhodaj. Heta značyć, kali partnior biare ŭdzieł u pracesie, heta treba razumieć jak jaho dazvoł na dziejańni seksualnaha charaktaru.