Łukašenka raspavioŭ, jakija pytańni choča abmierkavać na samicie JEAES u Pieciarburhu

04.12.2018 / 13:15

Skrynšot ź videa

Alaksandr Łukašenka maje namier abmierkavać z prezidentami inšych krain JEAES 6 śniežnia ŭ Sankt-Pieciarburhu stvareńnie roŭnych umoŭ dla pradpryjemstvaŭ na rynku enierharesursaŭ, piša interfax.by.

«Kali niaroŭnyja ŭmovy, z časam na našych pradpryjemstvach možna «pastavić kryž». Vy, dapuścim, pa 40 dołaraŭ haz atrymlivajecie, a my 200-250. Roźnica vielizarnaja. My tady pavinny i pa inšych vydatkach (skaračać), u nas tady zarobak nie atrymlivajecca, jak u Rasii. Roznyja ŭmovy. Ja z hetym jedu (na sustreču prezidentaŭ krain JEAES), pieradusim», — zajaviŭ A. Łukašenka ŭ intervju telekanału «Rasija 24», pakazanym u aŭtorak u efiry dla dalokaŭschodniaha rehijonu.

Kamientujučy zakłapočanaść Biełarusi stvareńniem adzinych rynkaŭ enierharesursaŭ, kiraŭnik krainy skazaŭ: «Dla nas heta važna, kab my pracavali ŭ roŭnych umovach sa smalenskimi, maskoŭskimi, picierskimi pradpryjemstvami». «Tady stvarajecca roŭnaja kankurentazdolnaść, narmalnaja. My pra heta damaŭlalisia», - padkreśliŭ A.Łukašenka.

Pavodle jaho słoŭ, u JEAES nie pracuje šerah bazavych pahadnieńniaŭ. «My damaŭlalisia ab svabodnym ruchu pracoŭnaj siły, kapitału, pasłuh i tavaraŭ - biez hetaha nie moža być nie tolki JEAES, mytnaha sajuza nie moža być. Čamu ŭ nas hetaha niama?» - paznačyŭ A.Łukašenka temu svajho vystupu na samicie. «My damaŭlalisia ab roŭnych umovach haspadarańnia dla pradpryjemstvaŭ u JEAES. My damaŭlalisia ab adzinych rynkach, u tym liku enierharesursaŭ. Ceły kompleks damovaŭ byŭ, tamu ŭ hety sajuz i pryjšli. My išli na kampramis, inšyja krainy taksama išli na kampramis. My pra heta damaŭlalisia», - nahadaŭ jon