Raman Natałki Babinaj «Rybin horad» pieravydadzieny ŭ formie elektronnaj knihi
16.06.2018 / 14:09
U vydaviectvie «Januškievič» vyjšła elektronnaje vydańnie ramana Natałki Babinaj «Rybin horad». Heta ŭžo treciaje vydańnie na biełaruskaj movie viadomaha tvoru piśmieńnicy. Upieršyniu jon vyjšaŭ u sieryi «Kniharnia Naša Niva», vydadzienaj u honar 100-hodździa našaha vydańnia. Raman byŭ finalistam prestyžnaj jeŭrapiejskaj litaraturnaj premii Angelus, a taksama pierakładzieny na polskuju (Miasto ryb), ukrainskuju (Ribhorod), anhlijskuju (Down Among the Fishes) movy.
«Rybin horad» — tvor niezvyčajny i šmatpłanavy. Jon spałučaje rysy vostrapalityčnaha, sacyjalnaha, pryhodnickaha, histaryčnaha i detektyŭnaha ramanu. U mastackaj formie u im pakazanyja palityčnyja realii Biełarusi, u pryvatnaści — jak tut zazvyčaj prachodziać vybary. Taksama niekatoryja krytyki ličać raman Babinaj fieministyčnym, chacia sama aŭtarka z takim vyznačeńniem kateharyčna nie pahadžajecca.
Krytyki i čytačy z roznych krain uvohule mnoha pisali pra «Rybin horad». Voś niekatoryja vykazvańni:
«Mnie b chaciełasia, kab kali-niebudź raman patrapiŭ ŭ školnyja prahramy», — Anatol Ivaščanka, Biełaruś.
«Aj, što kazać, dobraja kniha. Daj, Natałka, pacałuju!» — Krysty-Krysty (Kryścina Kurčankova), sajt LiveLib.
«Heta kniha nie pra Łukašenku» — rekłamny łozunh, pad jakim kniha pradavałasia ŭ Polščy.
«Spojleryć nie budu, ale tut jość čamu ździvicca: jak možna ŭ adnosna nievialikuju pa abjomie knihu źmiaścić stooooooooooooolki — i detektyŭnuju historyju z kuplaj-prodažam ziamli, i prezidenckija vybary (u Biełarusi — a heta samo pa sabie detektyŭ!), i pošuki skarbu, i historyju siamiejnych adnosin, i fantazijna-fantastyčnyja pieramiaščeńni hałoŭnaj hieraini praz nory ŭ časie ŭ dalokaje minułaje, da prodkaŭ, a taksama mini-viersiju siužetu pra suśvietny patop…» — Lilija Łaŭrynovič, Łuck, Ukraina.
«Hety jarki raman raskryvaje pryvabnaść Biełarusi, ale taksama pakazvaje, u jakich niečałaviečych umovach žyvuć tam mnohija ludzi», — prafiesar Arnold MakMiłan, Vialikabrytanija.
«U čym Babina dasiahnuła pośpiechu, dyk heta ŭ tym, kab mocna trymać uvahu čytača. Biaźmiernaja chitraść aŭtarki vielmi dobra spraŭlajecca z hetym zadańniem da apošniaj, 350-j, staronki. Kraina, jakaja kryjecca pamiž Rasijaj, Polščaj i Ukrainaj, adčuvaje upłyŭ susiedziaŭ. (…) I ŭ hetym Vaviłonie pytańnie movy stanovicca pytańniem etyki dy etykietu», — Bredli Horski, ZŠA, Kalifarnijski ŭniviersitet.
«Ci varta čytać «Rybin horad»? Nie varta. TREBA!» — Mahda Ščepaniak, Polšča.
Pračytać pačatak ramana dy nabyć knihu možna tut.
Zaraz Natałka Babina pracuje nad praciaham «Rybinaha horadu». «U hałavie jość užo ŭsio, nabrana na kampie — pałavina», — kaža piśmieńnica.
U vydaviectvie «Januškievič» rychtujecca da publikacyi taksama pieravydańnie zbornika apaviadańniaŭ Natałki Babinaj «Kryvi nie pavidna być vidna».