Xiaomi пахвалілася першым месцам па продажах смартфонаў у Беларусі
07.12.2017 / 16:00
Сёння кампанія Xiaomi правяла прэзентацыю новых «безрамачнікаў» Redmi 5 і Redmi 5 Plus, але перад гэтым распавяла пра свае дасягненні ў продажах смартфонаў. Пра гэта паведамляе GSMArena.
У трэцім квартале 2017 года вытворцы ўдалося адгрузіць 27,6 мільёнаў апаратаў. У гэты ж перыяд годам раней адгрузкі склалі 13,6 мільёнаў прылад. Рост у параўнанні з 2016 годам - 102,6%. Займаная доля рынку таксама ўзрасла з 3,7% да 7,4%.
Для параўнання: кампанія Apple паказала рост за ўсё ў 2,6%. Займаная ёй доля рынку не змянілася (12,5%).
Прадстаўнікі Xiaomi таксама заявілі, што ў 14 краінах у трэцім квартале 2017 года яны ўвайшлі ў топ-5 самых прадаваных марак смартфонаў.
Цікава, што сярод гэтых краін ёсць і Беларусь. Прычым Xiaomi сцвярджае, што ў нашай краіне па колькасці прададзеных прылад (у 3-м квартале) яны знаходзяцца на першым месцы.
І гэта сапраўды так: як пацвердзіла крыніца, знаёмая са справаздачамі аналітычнай кампаніі Gfk, Xiaomi лідзіравала на рынку Беларусі ў трэцім квартале, калі гаворка ідзе пра колькасць прададзеных смартфонаў. У грашовым вымярэнні лідарам у нас была кампанія Samsung.