Muž rabiŭ zakładki, žonka źviazvałasia z aptavikami: zatrymali siamiejnuju paru narkahandlaroŭ
17.04.2017 / 11:49
13 krasavika ŭ Minsku byŭ zatrymany 30-hadovy žychar Mahilova. Pavodle papiaredniaj infarmacyi, u hety dzień mužčyna pryjechaŭ zrabić u Minsku čarhovyja zakładki ź psichatropnym rečyvam.
«Paśla vyśvietliłasia, što pracavaŭ mužčyna razam sa svajoj žonkaj na internet-kramie, jakaja zajmajecca raspaŭsiudžvańniem psichatropaŭ. Žonka, 31-hadovaja mahilaŭčanka taksama zatrymanaja. Siamiejnaja para naładziła zbyt psichatropnych rečyvaŭ u Mahilovie i Minsku šlacham schovanak-zakładak. Akramia hetaha samastojna doma rychtavali kurylnyja sumiesi», - paviedamlaje pres-słužba HUUS Minharvykankama.
Zakładki pa Minsku i Mahilovu rabiŭ muž. Potym paviedamlaŭ žoncy miesca schovanak, jana źviazvałasia z drobnymi aptavikami, tyja, u svaju čarhu, raspaŭsiudžvali «tavar» siarod klijentaŭ. Pracavała takim čynam siamiejnaja para niekalki miesiacaŭ.
Ahulnaj masaj ŭ muža i žonki kanfiskavana kala dvuch kiłahramaŭ rečyvaŭ, jakija majuć u składzie psichatropnyja kampanienty, a taksama kala 670 hramaŭ kurylnaj sumiesi.
U chodzie pieratrusu ich miesca žycharstva ŭ Mahilovie milicyjanty vyjavili pradmiety, jakija vykarystoŭvalisia jak łabaratornaja posud, dźvie reśpiratornyja maski, humovyja palčatki, elektronnyja šali, fasovačnyja pakiety.
Za niezakonnyja dziejańni ź psichatropnymi rečyvami ŭ dačynieńni da žycharoŭ Mahilova raspačata kryminalnaja sprava, siamiejnaj pary pahražaje pazbaŭleńnie voli až da 15 hadoŭ. Pry hetym, doma ŭ ich zastalisia małaletnija dzieci - małodšamu ź ich try hady.